ރައްޔިތުންގެ މަޖިލީހުގެ ނައިބު ރައީސްގެ މަޤާމުން ވަކިކުރުމުގެ މައްސަލަ މިއަދުގެ ޖަލްސާއަށް ތާވަލުކޮށްފައި ވަނިކޮށް، އެ މަޤާމުން އިސްތިއުފާ ދެއްވިކަން ނާޒިމް އިޢުލާން ކުރައްވައިފިއެވެ.
މިއަދު (31 މެއި 2026) ނެރުއްވި ނޫސް ބަޔާނެއްގައި ނާޒިމް ވިދާޅުވީ، އޭނާ މަޤާމުން ވަކިކުރުމަށް ހުށަހަޅާފައިވާ ޤަރާރުގައިވާ ތުހުމަތުތަކަކީ އެއްވެސް އަސާސެއް ނެތް ކަންތައްތަކެއް ކަމަށެވެ. އަދި އެ ތުހުމަތުތައް ސާބިތުކޮށްދިނުމަށް އެއްވެސް ހެއްކެއް ނުވަތަ ޤަރީނާއެއް އެ ޤަރާރުގައި ބަޔާންކޮށްފައި ނުވާކަން އޭނާ ފާހަގަކުރެއްވިއެވެ.
ނާޒިމްގެ ބަޔާނުގައި ވިދާޅުވެފައިވަނީ، މަޖިލީހުގެ ނައިބު ރައީސްގެ ހައިސިއްޔަތުންނާއި މެންބަރެއްގެ ހައިސިއްޔަތުންވެސް، ޤާނޫނުއަސާސީއާއި މަޖިލީހުގެ ޤަވާއިދާ ޚިލާފުވެފައިވާ ކަމުގެ އެއްވެސް ޝަކުވާއެއް މިހާތަނަށް އެއްވެސް ފަރާތަކުން އުފުލާފައި ނުވާ ކަމަށެވެ. އޭނާ މަޤާމުގެ ވާޖިބުތައް އަދާކުރައްވާފައިވަނީ ޤާނޫނީ ހަމަތަކުގެ މަތިން، ތެދުވެރިކަމާއި އަމާނާތްތެރިކަމާއެކު ކަމަށްވެސް ވިދާޅުވިއެވެ.
”އަޅުގަނޑު މަސައްކަތް ކޮށްފައިވާނީ ޤާނޫނާއި ޤަވާއިދުގެ އިމުގެ ތެރެއިން ހުރިހާ މެންބަރުންނަށް ހަމަހަމަ ފުރުޞަތުތައް ތަނަވަސްކޮށްދިނުމަށެވެ. އެއްވެސް މެންބަރެއްގެ ވާޖިބެއް އަދާކުރުމަށް ހުރަސްއަޅާފައެއް ނުވާނެ،“ ނާޒިމްގެ ބަޔާނުގައިވެއެވެ.
މީގެ އިތުރުން، މަޤާމުގެ ނުފޫޒު ބޭނުންކޮށްފައި ނުވާނެ ކަމަށާއި، ވަކި ސިޔާސީ ފިކުރަކަށް ތަބާވެ ޤާނޫނާ ޚިލާފު އެއްވެސް ކަމެއް ކުރައްވާފައި ނުވާނެ ކަމުގެ ޔަޤީންކަން އޭނާ ދެއްވިއެވެ.
އިސްތިއުފާ ދެއްވި ސަބަބާ ގުޅޭގޮތުން ނާޒިމް ވިދާޅުވީ، އޭނާ މަޤާމުން ވަކިކުރަން ހުށަހެޅި ސަބަބުތަކަކީ ހަޤީޤަތެއް ނޫން ކަމުގައި ވިޔަސް، ވެރިކަން ކުރާ ޕާޓީގެ ޕާލަމެންޓަރީ ގްރޫޕްގެ ހުރިހާ މެންބަރުން ސޮއިކުރައްވައި އެފަދަ ހުށަހެޅުމެއް ހުށަހެޅުމުން، އެކަމަށް އިޖާބަ ދިނުމަކީ ޑިމޮކްރަސީގެ ހަމަތަކުން އެންމެ ތަހުޒީބީ ގޮތް ކަމަށް ދެކޭތީ ކަމަށެވެ.
އިސްތިއުފާ ދެއްވަމުން ނާޒިމް ވަނީ ކުރެވިފައިވާ ހުރިހާ ތުހުމަތުތަކަކަށް އިންކާރު ކުރައްވާފައެވެ. ނަމަވެސް، ރައްޔިތުންގެ ޚާދިމެއްގެ ގޮތުގައި އަބަދުވެސް ދެމިހުންނަވާނެ ކަމަށާއި، ދިވެހި ދައުލަތުގައި ޤާނޫނުގެ ވެރިކަން ނަގަހައްޓަން މަސައްކަތް ކުރައްވާނެ ކަމުގެ ޔަޤީންކަން ރައްޔިތުންނަށް ދެއްވިއެވެ.
— Ahmed Nazim (@MP4Dhiggaru) May 31, 2026
ނާޒިމްގެ މި ނިންމެވުން އައިސްފައިވަނީ މަޖިލީހުގެ ރައީސް އަބްދުއްރަހީމް އަބްދުﷲ ރިޔާސަތުގައި އިންނަވައިގެން މިއަދުގެ ޖަލްސާގައި މި މައްސަލަ ކުރިއަށް ގެންދިއުމަށް ތާވަލުކޮށްފައި ވަނިކޮށެވެ.
