ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅިގެން، ދުންފަތާއި ނިކޮޓިންގެ ވަބާއިން ދިވެހި ރައްޔިތުން ސަލާމަތްކުރުމަށް ސަރުކާރުން ކުރަމުންދާ މަސައްކަތްތައް އިތުރަށް ވަރުގަދަކުރައްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
މި ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، ދުންފަތުގެ ނުރައްކަލުން ދިވެހި މުޖުތަމައު ރައްކާތެރިކުރުމަށްޓަކައި ސަރުކާރުން ހަރުދަނާ ފިޔަވަޅުތަކެއް އަޅަމުންދާ ކަމަށެވެ. އެގޮތުން، އީ-ސިގިރޭޓް ނުވަތަ ވޭޕް ކުރުން ރާއްޖޭގައި މަނާކުރުމާއި، ދުނިޔޭގައިވެސް ފުރަތަމަ ފަހަރަށް ”ޖެނެރޭޝަނަލް ބޭން“ ނުވަތަ ވަކި އުމުރަކުން ފެށިގެން ދުންފަތް މަނާކުރުމުގެ ސިޔާސަތު ތަންފީޒުކުރާ ގައުމަކަށް ރާއްޖެ ވުމަށް ކުރަމުންދާ މަސައްކަތްތައް ރައީސް ފާހަގަކުރެއްވިއެވެ.
ރައީސްގެ ޕޯސްޓުގައި އިތުރަށް ފާހަގަކުރެއްވި ގޮތުގައި، ޒުވާނުންނަށް އަމާޒުކޮށްގެން އާޓިފިޝަލް އިންޓެލިޖެންސް (AI) ބޭނުންކޮށްގެން ކުރާ މާކެޓިން ކެމްޕޭންތަކާއި، ރަހަ އެކުލެވޭ ނިކޮޓިން ޕައުޗް ފަދަ އާ ނުރައްކާތައް ދަނީ ފެންމަތިވަމުންނެވެ. މިފަދަ ނުރައްކާތަކުން ސަލާމަތްވުމަށްޓަކައި ސަރުކާރުން އަބަދުވެސް ސަމާލުވެ އޮންނާނެ ކަމަށާއި، ދުންފަތް ކޮންޓްރޯލް ކުރުމުގެ ގަވާއިދުތަކާއި، ގާނޫނީ އިސްލާހުތައް އިތުރަށް ހަރުދަނާ ކުރައްވާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ދޭ ޚިދުމަތްތައް ފުޅާކުރުމާއި، ދުންފަތުގެ ދުން ނެތް ސަރަހައްދުތައް އިތުރުކުރުމަށް ސަރުކާރުން އިސްކަންދޭނެ ކަމަށްވެސް ރައީސް ވިދާޅުވިއެވެ.
On #WorldNoTobaccoDay, we renew our commitment to protecting our people from the dangers of tobacco and nicotine addiction. From banning e-cigarettes to becoming the first country in the world to implement a Generational Ban on Tobacco, we are taking decisive action to achieve… pic.twitter.com/HprDaPSutZ
— Dr Mohamed Muizzu (@MMuizzu) May 31, 2026
ރައީސުލްޖުމްހޫރިއްޔާގެ ޕޯސްޓް ނިންމަވާލެއްވީ، ދުޅަހެޔޮ، ދުންފަތުގެ އިސްތިއުމާލުން ސަލާމަތްވެފައިވާ ރާއްޖެއެއް ބިނާކުރުމަށް ހުރިހާ ރައްޔިތުން އެކުގައި މަސައްކަތް ކުރުމަށް އިލްތިމާސް ކުރައްވަމުންނެވެ.
