ލ. އަތޮޅަކީ ޔުނެސްކޯ ބަޔޮސްފިއަރ ރިޒާވްއެއްގެ ގޮތުގައި ކަނޑައެޅުމަށްޓަކައި، އެކަމާ ގުޅޭ ހުށަހެޅުން ނުވަތަ ޕްރޮޕޯސަލް މިއަހަރުގެ ތެރޭގައި ހުށަހެޅުމަށް މަސައްކަތް ކުރަމުންދާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން ހާމަކޮށްފިއެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ، ކުރިއަށް އޮތް ފަސް އަހަރުގެ ތެރޭގައި ރާއްޖޭގައި އިތުރު ތިން ބަޔޮސްފިއަރ ރިޒާވާއި ނޭޗަރ ޕާކުތައް ގާއިމުކުރުމުގެ އަމާޒަށް ވާސިލުވުމަށް ކުރެވޭ މުހިންމު މަސައްކަތެކެވެ. ސަރުކާރުގެ ފުރަތަމަ އަހަރުގެ ތެރޭގައި މި ފުރުސަތު ހުޅުވާލުމާ ގުޅިގެން، ޝައުގުވެރިކަން ފާޅުކުރި އަތޮޅުތަކުގެ ތެރެއިން ލ. އަތޮޅާއި ޅ. އަތޮޅުގެ މަސައްކަތްތައް ބާރު ދުވެލީގައި ކުރިއަށްދާ ކަމަށް އެ ވުޒާރާއިން ފާހަގަކުރެއެވެ.
ތިމާވެއްޓާ ބެހޭ ވުޒާރާއިން މަޢުލޫމާތު ދެއްވި ގޮތުގައި، ލ. އަތޮޅު ބަޔޮސްފިއަރ ރިޒާވްއަކަށް ހެދުމަށް ބޭނުންވާ ފަންނީ ލިޔެކިޔުންތައް މިހާރު ވަނީ އެއްކޮށް ނިމިފައެވެ. މިހާރު ކުރިއަށްދަނީ މި މަޝްރޫއާ ގުޅޭގޮތުން ރައްޔިތުން ހޭލުންތެރިކުރުވުމާއި، އާންމުންގެ ޚިޔާލު ހޯދުމުގެ މަރުހަލާއެވެ.
”ބަޔޮސްފިއަރ ރިޒާވްއަކީ ހަޤީގަތުގައި ރައްޔިތުން ބޭނުންވެގެން ކުރާކަމެއް. ލ. އަތޮޅުގައި ދެން ކުރަން އޮންނަ ކަމަކީ ރައްޔިތުންގެ ހިޔާލު ހޯދުމުގެ މަސައްކަތް. ކުރިން އިން ތިން ބަޔޮސްފިއަރ ރިޒާވްތައް ބަޔޮސްފިއަރ ރިޒާވްއަކަށް ވުމުގެ ކުރިން ރައްޔިތުންގެ ހިޔާލު ހޯދިން. ދެން ލާމު އަތޮޅުގައި ދެން އިން މަސައްކަތަކީ އެތަނުގެ ކޮމިއުނިޓީގެ ބަހެއް ހޯދުން،“ އެންވަރމަންޓް މިނިސްޓްރީން ބުނެފައިވެއެވެ.
ލ. އަތޮޅުގެ އިތުރުން ޅ. އަތޮޅު ވެސް ބަޔޮސްފިއަރ ރިޒާވްއަކަށް ބަދަލުކުރުމަށް ބޭނުންވާ ފަންނީ ދިރާސާތައް މިހާރު ކުރިއަށްދާކަން ސަރުކާރުން ވަނީ ފާހަގަކުރައްވާފައެވެ.
ރާއްޖޭގައި މިހާތަނަށް ޔުނެސްކޯ ބަޔޮސްފިއަރ ރިޒާވްގެ ދަރަޖަ ލިބިފައިވަނީ ބ. އަތޮޅުގެ އިތުރުން އައްޑޫ ސިޓީއާއި ފުވައްމުލައް ސިޓީއަށެވެ. މިފަދަ ދަރަޖައެއް ލިބުމުން އެ ސަރަހައްދެއްގެ ގުދުރަތީ ވަސީލަތްތަކާއި ދިރުންތައް ހިމާޔަތްކުރުމުގެ ނިޒާމު ވަރުގަދަވެ، ދެމެހެއްޓެނިވި ތަރައްގީއަށް މަގުފަހިވެގެންދެއެވެ.
ބަޔޮސްފިއަރ ރިޒާވްގެ ދަރަޖަ ފުރަތަމަ ދެވެނީ 10 އަހަރުގެ މުއްދަތަށެވެ. އެ މުއްދަތު ހަމަވުމުން އަލުން ސާވޭތައް ކުރުމަށްފަހު ޔުނެސްކޯއަށް ހުށަހަޅައިގެން އެ ދަރަޖަ ދަމަހައްޓަން ޖެހެއެވެ. މިކަން ކާމިޔާބުކަމާއެކު ކުރިއަށް ގެންދިއުމަށްޓަކައި އެ ސަރަހައްދެއްގެ މުއައްސަސާތަކާއި ރައްޔިތުންގެ އެއްބާރުލުން ނުހަނު ބޭނުންވާނެއެވެ. މިއީ ތިމާވެށި ރައްކާތެރިކުރުމުގެ އިތުރުން ރާއްޖޭގެ ފަތުރުވެރިކަމަށް ވެސް ލިބިގެންދާނެ ބޮޑު ކުރިއެރުމެކެވެ.
