އަރި އަތޮޅު ކޮންސްޓަންސް ހަލަވެލި ރިސޯޓް ކައިރިން ދަތުރުކުރަމުންދިޔަ ސްޕީޑްބޯޓެއް ދިޔަވެ، އަޑިއަށްދާ ކަމުގެ ރިޕޯޓު ލިބުމާ ގުޅިގެން އޭގައި ތިބި 20 މީހުން ރައްކާތެރިކަމާއެކު ސަލާމަތްކޮށްފިއެވެ.
މި ހާދިސާގެ ރިޕޯޓު ފުލުހުންނަށް ލިބިފައިވަނީ 2026 މެއި 30 ވަނަ ދުވަހުގެ ދަންވަރު 01:45 ހާއިރުއެވެ. ހަލަވެލި ރިސޯޓް ކައިރިން ދަތުރުކުރަމުންދަނިކޮށް ދިޔަވާން ފެށި މި ލޯންޗުގައި އެ ވަގުތު 20 މީހުން ތިބި ކަމަށް މައުލޫމާތު ލިބެއެވެ.
މި ހާދިސާ ހިނގުމާއެކު، ލޯންޗުގެ ވެރިފަރާތުން ވަނީ ވަގުތުން އެ ސަރަހައްދަށް އިތުރު ލޯންޗެއް ފޮނުވާފައެވެ. އަދި ދިޔަވަމުންދިޔަ ލޯންޗުގައި ތިބި 20 މީހުން، ވެރިފަރާތުން ފޮނުވި ލޯންޗަށް ރައްކާތެރިކަމާއެކު ބަދަލުކޮށް، އެންމެން ވަނީ ސަލާމަތްކޮށްފައެވެ.
އުޅަނދުގެ ވެރިފަރާތުން ފުލުހުންނަށް މައުލޫމާތު ދީފައިވާ ގޮތުގައި، މި ހާދިސާގައި ސަލާމަތްކުރި އެންމެންގެ ހާލުވެސް ރަނގަޅެވެ. އަދި އެއްވެސް މީހަކަށް އަނިޔާއެއް ލިބިފައި ނުވާކަން ވެރިފަރާތުން ކަށަވަރުކޮށްދެއެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
