މަންފާ ޖަމިއްޔާގެ ފަރާތުން މިއަހަރުގެ އަޟްޙާ އީދު ފާހަގަކުރުމަށް އއ. ފެރިދޫގައި ކުރިއަށް ގެންދިޔަ ”މަންފާ އީދު އުފާ“ ހަރަކާތްތައް، ކުލަގަދަ މަދަހަ މުބާރާތަކާއެކު ކާމިޔާބުކަމާއެކު ނިންމާލައިފިއެވެ.
ފެރިދޫ ކައުންސިލް އިދާރާގެ ހޯލުގައި ބޭއްވި މި މަދަހަ މުބާރާތަކީ އެ ރަށުގެ 15 އަހަރުން ދަށުގެ ދަރިވަރުންނަށް ޚާއްސަކޮށްގެން ކުރިއަށް ގެންދިޔަ މުބާރާތެކެވެ. މި މުބާރާތުގައި އެ ރަށުގެ ގިނަ އަދަދެއްގެ ދަރިވަރުން ބައިވެރިވެ، ތަފާތު ރީތި މަދަހަތަކެއް ވަނީ ހުށަހަޅައިދީފައެވެ.
އީދުގެ ހަރަކާތްތައް ނިންމުމަށް ބޭއްވި ޚާއްސަ ހަފްލާގައި، މަދަހަ މުބާރާތުން ވަނަވަނައަށް އައި ދަރިވަރުންނަށް ވަނީ އަގުހުރި އިނާމުތަކެއް ބަހާފައެވެ. އެގޮތުން މުބާރާތުން އެއްވަނައަށް އައި ބައިވެރިޔާއަށް 2,500 ރުފިޔާގެ ފައިސާގެ އިނާމާއި، ޓްރޮފީ އަދި ހަނދާނީ ލިޔުން ދީފައިވެއެވެ. ދެވަނައަށް އައި ބައިވެރިޔާއަށް 1,500 ރުފިޔާގެ ފައިސާގެ އިނާމާއި، ޓްރޮފީ އަދި ހަނދާނީ ލިޔުން ދީފައިވާއިރު، ތިންވަނައަށް ހޮވުނު ބައިވެރިޔާއަށް ދީފައިވަނީ 1,000 ރުފިޔާގެ ފައިސާގެ އިނާމާއި، ޓްރޮފީ އަދި ހަނދާނީ ލިޔުމެވެ. މީގެ އިތުރުން މުބާރާތުގައި ބައިވެރިވި ހުރިހާ ދަރިވަރުންނަށްވެސް ވަނީ ހަނދާނީ ލިޔުމާއި ހަދިޔާ ބަހާފައެވެ.
މި މުބާރާތުގެ ތެރެއިން، މަދަހަ ކިޔުމުގެ ދާއިރާއިން ކުރިއަށްދާން ބޭނުންވާ ދަރިވަރުންނަށް ވަނީ މުހިންމު މައުލޫމާތުތަކެއް ދީފައެވެ. އެގޮތުން މަދަހަ މުބާރާތްތަކުގައި ބައިވެރިވާއިރު ވިސްނަންޖެހޭ މުހިންމު ކަންކަމާ ގުޅޭގޮތުން އިބްރާހިމް ރަމީޒު ވަނީ ދަރިވަރުންނަށް އިރުޝާދު ދެއްވާފައެވެ. މަންފާ ޖަމިއްޔާއިން ބުނީ، ކުރިއަށް އޮތް ތަނުގައި ފެރިދޫގައި މިއަށްވުރެ ފުޅާދާއިރާއެއްގައި މަދަހަ މުބާރާތެއް ބޭއްވުމަށް މިހާރު އިއުލާނުކޮށްފައިވާ ކަމަށެވެ.
މަންފާ ޖަމިއްޔާއިން މިއަހަރުގެ ބޮޑު އީދު ރަސްމީކޮށް ފާހަގަކުރުމަށް ފެރިދޫ އިޚްތިޔާރުކުރިއިރު، އެ ރަށުން ވަނީ އެ ޖަމިއްޔާގެ ޓީމަށް ވަރަށް ހޫނު މަރުހަބާއެއް ކިޔާފައެވެ. މިގޮތުން ބޭއްވުނު ހަރަކާތްތަކުގެ ތެރެއިން އެންމެ ފާހަގަކޮށްލެވުނު އެއް ކަމަކީ އީދު ދުވަހުގެ ހަވީރު ބޭއްވި ކުޑަކުދިންގެ ހަވީރެވެ. މިއީ މިހާތަނަށް އެ ރަށުގައި ބޭއްވުނު އެންމެ ކުލަގަދަ ކުޑަކުދިންގެ ހަވީރުކަން ފާހަގަކުރެވެއެވެ. އަދި ފެރިދޫގައި ބޭއްވި ބޮޑު އީދު ނަމާދު އިމާމުވެ ކުރެއްވީ އަލީ ރަމީޒެވެ.
މަންފާ ޖަމިއްޔާއިން އިތުރަށް ބުނީ، ކުރިއަށް އޮތް ދުވަސްތަކުގައި ފެރިދޫގައި ދީނީ އެކި ހަރަކާތްތައް ހިންގުމާ ގުޅޭގޮތުން އެ ރަށު ކައުންސިލާއެކު މަޝްވަރާ ކުރެވިފައިވާ ކަމަށެވެ.
