އަބޫދާބީ / ޓެލް އަވީވް – ގަލްފުގެ ޤައުމުތަކުން މެދުއިރުމަތީގެ ހަނގުރާމައިގައި ވަކި ފަރާތަކަށް ނުޖެހި ތިބޭކަމަށް ދައްކަމުންދިޔަ ދެއްކުންތައް މުޅިން ބަދަލުވެއްޖެއެވެ. މެއި 30، 2026 ގައި ”ވޯލް ސްޓްރީޓް ޖާނަލް“ (ޑަބްލިއު.އެސް.ޖޭ) އިން ބޭޒާރުކޮށްލި ސިއްރު ރިޕޯޓެއްގައި ބުނެފައިވާ ގޮތުން، ޔުނައިޓެޑް އެރެބް އެމިރޭޓްސް (ޔޫއޭއީ) އިން ވަނީ އިޒްރޭލާއި އެމެރިކާގެ ސިފައިންނާ ސީދާ ގުޅިގެން އީރާނުގެ އެކި ތަންތަނަށް އެތައް ފަހަރަކު ވައިގެ ޙަމަލާތައް ދީފައެވެ.
އަސްކަރީ އެލަޔަންސާއި ޙަމަލާގެ އަމާޒުތައް
ޔޫއޭއީ އިން އިޒްރޭލާއެކު ”އަބްރަހަމް އެކޯޑްސް“ ގެ ނަމުގައި ގުޅުން ޤާއިމުކުރީ ސުލްޙައާއި އިޤްތިޞާދީ ކުރިއެރުމުގެ ނަމުގައެވެ. ނަމަވެސް ޑަބްލިއު.އެސް.ޖޭ ގެ ރިޕޯޓުން ހާމަވާގޮތުގައި ޔޫއޭއީގެ އަސްކަރިއްޔާއިން މިހާރު މަސައްކަތްކުރަނީ ސީދާ އެމެރިކާއާއި އިޒްރޭލުގެ އިންޓެލިޖެންސްގެ އެހީގައެވެ.
ޙަމަލާގެ އަމާޒުތައް: ޔޫއޭއީގެ ވައިގެ ޙަމަލާތައް އަމާޒުކޮށްފައިވަނީ ހޯރްމުޒް ކަނޑުއޮޅީގެ މުހިންމު ރަށްތަކަށާއި، ބަންދަރު އައްބާސް ސިޓީގެ އިތުރުން، އީރާނުގެ ތެލާއި ހަކަތައިގެ މަރުކަޒުތަކަށެވެ.
އީރާނުގެ ރައްދު: އީރާނުގެ ޑެޕިއުޓީ ފޮރިން މިނިސްޓަރ ކާޒިމް ޣަރީބާބާދީ ވަނީ ޔޫއޭއީން އީރާނަށް ”ޣައްދާރުވެފައިވާ“ ކަމަށް ބުނެ، ޔޫއޭއީގައި ހުރި އެމެރިކާގެ އަސްކަރީ ބޭސްތަކަށް ޙަމަލާދިނުމަކީ އީރާނަށް އޮތް ޙައްޤެއް ކަމަށް ބުނެފައެވެ.
ކްރިޓިކަލް އެނަލައިސިސް: ވެސަލް/ޕްރޮކްސީ ސަރުކާރުތައް
މިއީ ބޭރުގެ ނުފޫޒުގަދަ ބާރުތަކުގެ މަސްލަޙަތުތައް ޙިމާޔަތްކުރުމަށްޓަކައި، ސަރަޙައްދީ ބައެއް ދައުލަތްތައް ޕްރޮކްސީން ނުވަތަ އެޖެންޓުންގެ ގޮތުގައި ބޭނުންކުރާކަމަށް ބުނާ ބުނުމަށް ބާރުދޭ ހެކިތަކެކެވެ. ފަލަސްޠީނާއި، ޢިރާޤު އަދި އަފްޣާނިސްތާނު ފަދަ ޤައުމުތަކުގައި ހާލުގައި ޖެހިފައިވާ މުސްލިމުންގެ ދިފާޢުގައި މަސައްކަތްކުރާ އާންމު ފަރާތްތަކަށް ހަރުކަށި ފިޔަވަޅުތަކާއި ހުރަސްތަކާ ކުރިމަތިލާންޖެހޭއިރު، އަނެއްކޮޅުން ސަރަޙައްދީ ބައެއް ޢަރަބި ޤައުމުތަކުގެ ސިޔާސަތުތައް ބައްޓަންވެފައިވަނީ ބޭރުގެ ބާރުތަކުގެ ސްޓްރެޓީޖިކް ބޭނުންތަކަށް ފުރުޞަތުލިބޭ ގޮތަށެވެ.
މިގޮތުން، އަވަށްޓެރި ޤައުމުތަކަށް އަމާޒުކޮށް ހިންގޭ އަސްކަރީ ހަރަކާތްތަކުން ދޭހަވަނީ، ޔޫއޭއީ ފަދަ ބައެއް ޢަރަބި ދައުލަތްތަކަކީ އަމިއްލަ މިނިވަން ސިޔާސަތުތަކެއް ގެންގުޅޭ ޤައުމުތަކެއްގެ ބަދަލުގައި، އެމެރިކާ އާއި އިޒްރޭލް ފަދަ ބާރުތަކުގެ ދިފާޢީ އަދި ސިޔާސީ މަސްލަޙަތުތައް ޙިމާޔަތްކޮށްދޭ ޑިޕްލޮމެޓިކް އަދި އަސްކަރީ އައްޑަނައެއްގެ ގޮތުގައި ޙަރަކާތްތެރިވާ ”ޕްރޮކްސީ“ ނުވަރަ ”ވޭސަލް‘ ދައުލަތްތަކެއްގެ ގޮތުގައެވެ.
