ރާއްޖޭގައި ރަސްމީކޮށް ފުޓުބޯޅަ ކުޅެން ފެށިތާ 75 އަހަރު ފުރުން ފާހަގަކުރުމުގެ ގޮތުން ބާއްވާ ”ޑައިމަންޑް ޖުބިލީ އިންޓަނޭޝަނަލް ފުޓުބޯޅަ މުބާރާތް“ އަންނަ ހޯމަ ދުވަހު ފެށުމަށް ތައްޔާރުވަމުންދާއިރު، މި މުބާރާތުގައި ވާދަކުރާ ހުރިހާ ޤައުމީ ޓީމުތަކެއް މިއަދު ރާއްޖެ އަތުވެއްޖެއެވެ.
މި މުބާރާތުގައި ޖުމްލަ ހަތަރު ޤައުމަކުން ވާދަކުރެއެވެ. އެއީ މުބާރާތް ބާއްވާ ޤައުމު ކަމަށްވާ ދިވެހިރާއްޖޭގެ އިތުރުން އަފްޣާނިސްޠާން، ބަންގްލަދޭޝް އަދި ޕާކިސްތާނެވެ.
ރާއްޖެއިން ބޭރުގެ ޓީމުތަކުގެ ތެރެއިން އެންމެ ފުރަތަމަ ރާއްޖެ އައީ އަފްޣާނިސްޠާން ޓީމެވެ. މިއަދު ހެނދުނު ރާއްޖެ އައި އެ ޓީމުގައި ޖުމްލަ 12 ކުޅުންތެރިން ހިމެނެއެވެ. އެއަށްފަހު، މިއަދު މެންދުރުފަހުގެ ވަގުތެއްގައި ބަންގްލަދޭޝްގެ ”ބީ“ ޓީމާއި ޕާކިސްތާންގެ ގައުމީ ޓީމު ވަނީ ރާއްޖެ އައިސްފައެވެ. ރާއްޖެއަށް ޒިޔާރަތްކުރި މި ތިން ޓީމުވެސް ކޭމްޕް ކުރުމަށް ހަމަޖެހިފައިވަނީ މާލޭގެ ބާސެލޯ ނަސަންދުރައިގައެވެ.
މި މުބާރާތުގައި ވާދަކުރާ ދިވެހިރާއްޖޭގެ ޤައުމީ ޓީމުވެސް މިރޭގެ ވަގުތެއްގައި ނަސަންދުރައަށް ބަދަލުވެ، ކޭމްޕް ކުރަން ފަށާނެ ކަމުގެ މަޢުލޫމާތު ވަނީ ލިބިފައެވެ.
މުބާރާތުގައި ވާދަކުރާ ރާއްޖޭގެ ޓީމު ވެސް މިރޭގެ ވަގުތެއްގައި ނަސަންދުރައިގައި ކޭމްޕް ކުރާ ކަމަށް މަޢުލޫމާތު ލިބެއެވެ.
މުބާރާތުގެ ފުރަތަމަ މެޗުގައި ކުޅޭނީ ޕާކިސްތާން އަދި ބަންގްލަދޭޝް އެވެ. ދެވަނަ މެޗުގައި ބައްދަލުކުރާނީ ދިވެހިރާއްޖެއާއި އަފްޣާނިސްތާނެވެ. މުބާރާތުގެ ހުޅުވުމުގެ ރަސްމިއްޔާތު އޮންނާނީ ރާއްޖެ ކުޅޭ މެޗުގެ ކުރިންނެވެ.
