މާތްވެގެންވާ އަޟްޙާ ޢީދުގެ އުފާ ފާހަގަކުރަމުންދާއިރު، ޢީދުގެ ކަންކަން ކުރިއަށްގެންދަންވާނީ އިސްލާމީ ރިވެތި އުޞޫލުތަކުގެ ތެރެއިން ކަމަށާއި، އެއީ މާތް ﷲ އަށް ޝުކުރުވެރިވުމަށް އޮތް ދުވަހެއްކަމަށް ދީނީ ޢިލްމުވެރިޔާ ޝެއިޚް ޒަމްޒަމް ފާރިޝް ވިދާޅުވެއްޖެއެވެ.
ޝެއިޚް ފާރިޝް ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ، މާތް ﷲ ޢީދު ދުވަސް ލައްވާފައިވަނީ އެކަލާނގެ މަތިވެރިކޮށް، ޝުކުރުވެރިވުމަށްޓަކައި ކަމަށެވެ. ނަމަވެސް، މިއަދު ބައެއް ރަށްރަށުން ފެންނަ މަންޒަރުތަކަށް ބަލާއިރު، އެއްބަޔަކު އަނެއް ބަޔަކަށް ފުރައްސާރަކޮށް، މަލާމާތްކުރުމުގެ ދުވަހެއްގެ ގޮތުގައި ޢީދު ހަދާފައިވާ ފަދަ އިހުސާސެއް ކުރެވޭ ކަމަށް ޝެއިޚް ކަންބޮޑުވުމާއެކު ފާހަގަކުރެއްވިއެވެ.
ޢީދުގެ ފޯރީގައި ނަމާދަށް ފަރުވާކުޑަ ކުރެވޭ މައްސަލައަށް އިޝާރާތް ކުރައްވައި ޝެއިޚް ސުވާލު އުފައްދަވާފައިވަނީ ”މިއަދު ޢީދު، މާދަން ނަމާދު ބާ؟“ މިފަދައިންނެވެ. މީގެ މާނައަކީ ޢީދުގެ އުފަލުގައި މަސްއޫލުވެ، އަޅުކަންތަކާ ދުރުހެލިވުމަކީ ހިތާމަހުރި ކަމެއްކަމެވެ.
ދަރިން ތަރުބިއްޔަތު ކުރުމާ ގުޅޭގޮތުން ޝެއިޚް ވިދާޅުވީ، ދަރިން ނުބައި ކަންކަމުން ދުރުކުރަން ބޭނުންވާނަމަ، އެކުދިން ލައްވައި ނުބައި ކަންކަމާ ދެކޮޅަށް އެއްޗެހި ކިޔުއްވައި، ރަނގަޅު މަގު ދައްކައިދޭން ޖެހޭ ކަމަށެވެ. މިއީ ކުދިންގެ ކިބައިގައި ދީނީ އަދި އަޚްލާޤީ ސިފަތައް އަށަގެންނެވުމަށް މުހިންމު ކަމެއްގެ ގޮތުގައި އޭނާ ފާހަގަކުރެއްވިއެވެ.
މީގެ އިތުރުން، ޢީދު ކުޅިވަރުތަކުގެ ނަމުގައި ހިންގޭ ނޭދެވޭ ކަންކަމަށް ފާޑުވިދާޅުވަމުން ޝެއިޚް ވިދާޅުވީ، ހިލޭ ފިރިހެނުންނާއި އަންހެނުންގެ ކުރިމަތީގައި ނަށައި، ނާޗަރަންގީ ކުޅެގެން އެހެން މީހުންގެ ސަމާލުކަން ހޯދުމަށް މަސައްކަތްކުރާ ބަޔަކަށް، އަމިއްލަ ޢާއިލާއަށް ދޭންޖެހޭ ލޯތްބާއި ސަމާލުކަން ދޭނެ ވަގުތެއް ނޯންނާނެ ކަމަށެވެ.
ޝެއިޚް ފާރިޝްގެ މި މެސެޖަކީ ޢީދުގެ އުފާ ފާހަގަކުރާއިރު، ދިވެހި މުޖުތަމަޢުގެ އިޖުތިމާޢީ ފޭރާން ހިފެހެއްޓުމަށާއި، އިސްލާމީ ވަހުދަތު ދެމެހެއްޓުމަށް ދެއްވި މުހިންމު ނަޞޭޙަތެކެވެ.
ކޮންމެ ޢީދަކާ ދިމާކޮށް މުންކަރާތްތަކަށް އަރައިގަންނަމުން ދިއުމާއި ގުޅިގެން ދީނީ ޢިލްމުވެރިން ދަނީ ނަޞޭޙަތްތެރިވަމުންނެވެ. އެހެންނަމަވެސް މިފަދަ ކޮންމެ ވަގުތަކު އެއްބަޔަކު ނުކުމެ ޢިލްމުވެރިންނަށް ފޮށި ފުރައްސާރަކުރެއެވެ.
