ކުޅުދުއްފުށި ސިޓީގައި ކުރިއަށްގެންދިޔަ މަށިމާލި ޕެރޭޑުގެ ސަބަބުން، މުޅި ރާއްޖޭގައި ފާހަގަކުރަމުންދާ ޢީދުގެ އުފާވެރިކަމާއި އިޖުތިމާއީ ގުޅުމަށް ކިލަނބުކަން އަންނަ ކަމަށް ކުރީގެ ބަންޑާރަ ނައިބު އަލްއުސްތާޛާ ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.
މީސް މީޑިއާގައި ހިއްސާކުރެއްވި ޕޯސްޓެއްގައި އާޒިމާ ވިދާޅުވީ، ޢީދަކީ އާއިލާތަކާއި މުޖުތަމައުގެ މެދުގައި ލޯތްބާއި ކުލުނު އާލާކުރުމަށް ލިބޭ ފުރުސަތެއް ނަމަވެސް، ސިޔާސީ ކަންކަމަށާއި މުޖުތަމައުގެ އެކިއެކި ފަރުދުންނަށް ފުރައްސާރަކޮށް ބާއްވާ މިފަދަ ހަރަކާތްތަކުގެ ސަބަބުން ގައުމުގައި އޮންނަންޖެހޭ ޢީދުގެ ހަގީގީ އުފާވެރިކަން ގެއްލިގެންދާ ކަމަށެވެ.
މަށިމާލި ޕެރޭޑަކީ ކުޅުދުއްފުށި ސިޓީގައި ޒަމާނުއްސުރެ ބާއްވަމުން އަންނަ ޕެރޭޑެއް ނަމަވެސް، މި ޕެރޭޑުގައި މީހުންނަށް ފުރައްސާރަކުރުމާއި ބޭއަދަބީ އެތަކެއް ކަމެއް އެކުލެވޭތީ، އެ ސިޓީގެ ކައުންސިލުން ވެސް ވަނީ އެފަދަ ހަރަކާތްތައް ރާވާ އިންތިޒާމުކުރާ ފަރާތްތަކަށް އެފަދަ ހަރަކާތްތައް ކުރިއަށް ނުގެންދިއުމަށް އިލްތިމާސްކޮށް ބަޔާނެއް ވެސް ނެރެފައެވެ.
މީގެ އިތުރުން، ޢީދު ފާހަގަކުރުމުގެ ނަމުގައި އެކަކު އަނެކަކަށް ފުރައްސާރަކޮށް ހަޖޫނުޖެހުމަށް މި އަހަރުގެ ޢީދު ޚުޠުބާގައި ވެސް ވަނީ ނަސޭހަތްތެރިވެފައެވެ.
ފާހަގަކޮށްލަންޖެހޭ ގޮތުގައި އާޒިމާގެ އިތުރުން އާންމުންގެ ވަރަށް ގިނަ ބަޔަކު ވެސް އަންނަނީ މިކަމާ ދެކޮޅަށް އަޑުއުފުލަމުންނެވެ. މީގެ ތެރޭގައި ކުޅުދުއްފުށި ސިޓީގެ ރައްޔިތުން ވެސް ހިމެނޭހެން ގިނަ ބަޔަކު އަންނަނީ މީސް މީޑިއާގެ އެކި މަންސަތަކުގައި މަށިމާލި ޕެރޭޑުގައި ހިމެނޭ ބައެއް ފުޅަނދުތަކާ މެދު ހިތްހަމަނުޖެހުން ފާޅުކުރަމުންނެވެ.
