ޝަރުއީ މިންގަނޑުތަކާ ހިލާފަށް މުދާ ހޯދުމާއި، ރިޝްވަތާއި ޖުވާ ކުޅުން ފަދަ ކަންކަމަކީ އިސްލާމްދީނުގައި ކަނޑައެޅިގެން ހަރާމްކުރައްވާފައިވާ ކަންކަން ކަމަށާއި އެފަދަ ކަންކަން ކުރާ މީހުންނަށް އޮތީ ނަރަކައިގެ ވޭންދެނިވި އަޒާބު ކަމަށް މިއަދުގެ ހުކުރު ހުތުބާގައި ބުނެފިއެވެ.
”ހޭދަކުރުމުގައި އިގްތިސާދުކުރުން“ މި މައުޟޫޢަށް ރާއްޖޭގެ އެކިކަންކޮޅުތަކުގައި އިއްވި ޚުޠުބާގައި ބުނީ، މުދަލަކީ މާތްالله އަޅުތަކުންނަށް ދެއްވާފައިވާ އަމާނާތެއް ކަމަށެވެ. އެ މުދަލުގެ ހަގީގީ މިލްކުވެރިއަކީ މާތްﷲ ކަމަށްވީއިރު، މުދާ ހޯދައި އެ މުދާ ހޭދަކުރުމުގައި ޝަރުއީ ހަމަތަކަށް ރިއާޔަތްކުރުމަކީ ކޮންމެ މުސްލިމެއްގެ ބޮލުގައި އެޅިފައިވާ ޒިންމާއެއް ކަމަށް ޚުޠުބާގައި ވަނީ ބުނެފައެވެ.
މުދާ ހޯދުމުގައި ގެންގުޅޭ ނުރަނގަޅު އާދަތަކަށް އަލިއަޅުވާލަމުން ޚުޠުބާގައި ބުނީ، ހިޔާނާތްތެރިވުމާއި، ފޭރުމާއި، ވައްކަންކުރުމާއި، ރިޝްވަތު ދިނުމާއި، ޓެކުމާއި، ރިބާގެ މުއާމަލާތްތަކުގެ އިތުރުން ޖުވާކުޅުމަކީ އިސްލާމްދީނުގައި ބޮޑުވެގެންވާ ފާފަތަކެއް ކަމަށެވެ. އަދި ނުހައްގުން މުދާ ހޯދާ މީހުންނަށް ގިޔާމަތް ދުވަހުން އޮތީ ނަރަކައިގެ ވޭންދެނިވި އަޒާބުކަން ކީރިތި ރަސޫލާގެ ހަދީޘް ބަސްފުޅުތަކުން ސާބިތުވާ ކަމަށް ޚުޠުބާގައި ބުނެފައިވެއެވެ.
މީގެއިތުރުން، މުދާ ހޭދަކުރުމުގައި އިސްރާފްކުރުމަކީ ފާފައެއްކަން ހަނދާންކޮށްދެމުން ޚުޠުބާގައި ބުނީ، ބޭނުންވާ މިންވަރަށް ވުރެ އިތުރަށް މުދާ ގަނެ، އެ ތަކެތި ބޭނުންނުކޮށް އުކާލަންޖެހުމަކީ ދީނީ ގޮތުންނާއި އިގްތިސާދީ ގޮތުންވެސް ނުރަނގަޅު އަމަލެއް ކަމަށެވެ.
ދިރިއުޅުމުގެ ހަރަދުތައް ބެލެހެއްޓުމުގައި އިގުތިސާދީ ވިސްނުން އިސްކުރުމަށް ގޮވާލަމުން ހުތުބާގައި ބުނީ، އަތްމަތި ދަތިވުމަށް މެދުވެރިވާ ސަބަބަކީ ލިބޭ މިންވަރަށްވުރެ އިތުރަށް ހަރަދުކުރުން ކަމަށެވެ. އަދި ކޮންމެހެން މަޖުބޫރު ހާލަތެއް މެދުވެރިވެގެން މެނުވީ ދަރަނި ނެގުމުގެ އާދަ ދޫކޮށްލުމަކީ ވަރަށް މުހިއްމު ކަމެއް ކަމަށް ޚުޠުބާގައި ވަނީ ބުނެފައެވެ.
ތިމާގެ މުދަލަކީ އޭގައި އެހެން މީހުންގެ ހައްގުތަކެއް އެކުލެވިގެންވާ އެއްޗެއްކަން ހަނދާންކޮށްދެމުން ޚުޠުބާގައި ވަނީ، އަނބިދަރިންނާއި، ގާތްތިމާގެ މީހުންގެ އިތުރުން ފަގީރުންނާއި މިސްކީނުންގެ ހައްގުތައް އަދާކުރުމަށް ނަސޭހަތްތެރިވެފައެވެ. އަދި ގިޔާމަތް ދުވަހު ކޮންމެ މީހަކާ ވެސް އެ މީހަކަށް ދެއްވި ނިއުމަތްތަކާ މެދު ސުވާލުވެވޭނެ ކަމަށް ވެސް ޚުޠުބާގައި ވަނީ ހަނދާންކޮށްދީފައެވެ.
