އިންޑިއާއަށްް ދަތުރުކުރުމުގެ ކުރިން، ސެލްފް ޑެކްލަރޭޝަން ފޯމް ފުރަންޖެހޭ ގޮތަށް އެ ގައުމުގެ ޑިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ހަމަޖައްސައިފިއެވެ.
އިންޑިއާއިން މިކަން މިގޮތަށް ކުރުމަށް ނިންމާފައިވަނީ، ޑިމޮކްރެޓިކް ރިޕަބްލިކް އޮފް ކޮންގޯގައި ފެތުރެމުންދާ އެބޯލާ ވައިރަހާ ސަބަބުން ދުނިޔޭގެ ސިއްހަތު ޖަމުއިއްޔާއިން ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން، އަމަލުކުރުމަށް ޑީޖީސީއޭ އެއާލައިންތަކުން ކަނޑައެޅި އެސްއޯޕީއެއްގައެވެ. މި އެސްއޯޕީގެ ދަށުން ފްލައިޓްތަކުގެ ތެރޭގައި ސަމާލު ކަަމަށް ގެންނަންޖެހޭ ކަންކަން އެންގުމާއި، ފަސިންޖަރުން ސެލްފް ޑެކްލަރޭޝަން ފޯމު ފުރުމަށް ވަނީ މަޖުބޫރުކޮށްފައެވެ.
މި ފިޔަވަޅުތައް އެޅުމުގެ މައިގަނޑު މަގުސަދަކީ، މި ބަލިޖެހިފައިވާ މީހުން ދުރާލައި ދެނެގަނެ، ފަސިންޖަރުންގެ ފަރާތުން މައުލޫމާތު ހޯދުމުގެ އިތުރުން އިންޑިއާގެ އެއަރޕޯޓުތަކުގެ ސަވައިލަންސް ނުވަތަ ބަލިތައް މޮނިޓަރކުރުމުގެ ނިޒާމު މިހާރަށްވުރެ އިތުރަށް ހަރުދަނާ ކުރުމެވެ.
އިންޑިއާގެ މި ނިންމުމާ ގުޅިގެން ގައުމީ އެއަރލައިން (މޯލްޑިވިއަން) އިން ނެރެފައިވާ ބަޔާނެއްގައި ވަނީ، އިންޑިއާ ސަރުކާރުގެ މި އެންގުމާ އެއްގޮތަށް ދަތުރުވެރިން އަމަލުކުރުމަށް އިލްތިމާސްކޮށްފައެވެ. އެގޮތުން ދަތުރުކުރުމުގެ ކުރިން ކިއުއާރް ކޯޑު މެދުވެރިކޮށް ފޯމު ފުރިހަމަކުރުމަށާއި، އިންޑިއާއަށް ދިއުމަށްފަހު، އެ ގައުމުގެ ހެލްތް އެންޑް އިމިގްރޭޝަން ކައުންޓަރަށް އެ ފޯމު ހުށަހެޅުމަށް ވަނީ އެދިފައެވެ.
އިންޑިއާގައި އެބޯލާ ވައިރަސް ފެތުރުން ހުއްޓުވުމަށްޓަކައި، އެއަރޕޯޓުތަކާއި އެ ގައުމަށް އެތެރެވެވޭ އެހެން ސަރަހައްދުތަކުގައި ސްކްރީންކުރުމުގެ އިތުރުން ސަވައިލަންސް ވަނީ ވަރުގަދަކޮށްފައެވެ.
