ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ކަރަންޓު އުފެއްދުމުގެ ގާބިލުކަން އިތުރުކުރުމަށް މަސައްކަތްތަކެއް ކުރަމުންދާ ކަމަށް އެ ކުންފުނީގެ މެނޭޖިންގ ޑިރެކްޓަރު ޑރ. ޢަލީ އަޒުވަރު ވިދާޅުވެއްޖެއެވެ.
ޑރ. އަޒުވަރު ވިދާޅުވި ގޮތުގައި، މާލެ ސަރަހައްދާއި އެ ކުންފުނިން ހިދުމަތް ދޭ އެހެނިހެން ރަށްރަށުގެ ކަރަންޓު އުފެއްދުމުގެ ގާބިލުކަން މިހާރު ހުރީ 222 މެގަވޮޓްގައެވެ. މީގެ އިތުރުން މާލެ ސަރަހައްދަކީ، ކަރަންޓުގެ ލޯޑު ނުވަތަ ޑިމާންޑް އާދަޔާ ހިލާފަށް ބޮޑުވަމުންދާ ތަނެއްކަން ފާހަގަކުރައްވަމުން އޭނާ ވިދާޅުވީ، އިމާރާތްތައް އުސްވެ އާބާދީ ތޮއްޖެހެމުންދާއިރު، ކޮންމެ އަހަރަކު ވެސް ކަރަންޓު ބޭނުންކުރާ ނިސްބަތް އިތުރުވަމުން އަންނަ ކަމަށެވެ.
”މި ސަރަހައްދުގެ އިތުރުވަމުންދާ ލޯޑަށް ކޭޓަރ ކުރުމުގެ ގޮތުން މާލެ ސަރަހައްދަށް ބޮޑު ޕްރޮޖެކްޓެއް ގެންނަންޖެހޭ. އެކަމާ ގުޅޭ މަސައްކަތްތައް މިހާރު ދަނީ ކުރެވެމުން،“ – ޑރ. އަޒުވަރު ވިދާޅުވިއެވެ.
ސްޓެލެކޯގެ ހިދުމަތްތައް މިހާރަށްވުރެ ބޮޑަށް ފުޅާކުރުމަށް ސަރުކާރުން ކުރަމުން އަންނަ މަސައްކަތްތަކުގެ ދަށުން، ފެނަކަ ކޯޕަރޭޝަނުން ބ. އަތޮޅުން ފެށިގެން މ. އަތޮޅާ ހަމައަށް ދިން ހިދުމަތްތައް މިހާރު ވަނީ ސްޓެލްކޯގެ ދަށަށް ބަދަލުކޮށްފައެވެ. މިއީ ސަރުކާރު ހިންގުމުގެ ނިޒާމަށް ދާދި ފަހުން ގެނެވުނު ބަދަލުތަކުގެ ތެރެއިން ގެނެވުނު ބަދަލެކެވެ.
މި ބަދަލާއެކު، އެ އަތޮޅުތަކުގައި ދިރިއުޅޭ ރައްޔިތުންނަށް ލިބޭ ހިދުމަތުގެ ފެންވަރު އިތުރަށް ހަރުދަނާ ވެގެންދާނެއެވެ.
