ގައުމީ އެއަރލައިން، މޯލްޑިވިއަންގެ ދަތުރުތައް މިހާރަށްވުރެ ބޮަޑަށް ފުޅާކުރުމަށް ކުރަަމުންދާ މަސައްކަތްތަކުގެ ދަށުން، ދެވަނަ ވައިޑް ބޮޑީ މަތިންދާބޯޓު މި އަހަރުގެ ފަހުކޮޅު ރާއްޖެ ގެނައުމަށް މަސައްކަތްކުރަމުންދާ ކަމަށް އައިލެންޑް އޭވިއޭޝަންގެ މެނޭޖިންގ ޑިރެކްޓަރު އިބްރާހިމް އިޔާސް ވިދާޅުވެއްޖެއެވެ.
އިޔާސް މި މޭރުމުން ވިދާޅުވީ، ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުންނެވެ. އޭނާ ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ގައުމީ އެއަރލައިންގެ ފްލީޓަށް އިތުރު ވައިޑް ބޮޑީ މަތިންދާބޯޓެއް އިތުރުކުރުމުގެ މަސައްކަތް ކުރިއަށްދާ ކަމަށެވެ. އެގޮތުން މިދިޔަ އަހަރުގެ ޖަނަވަރީ މަހު ފުރަތަމަ ވައިޑް ބޮޑީ މަތިންދާބޯޓު ގެނައުމަށްފަހު، ދެވަނަ ބޯޓު ގެނައުމުގައި ބައިނަލްއަގްވާމީ ބާޒާރުގައި މަތިންދާބޯޓުތަކަށް އޮތް ބޮޑު ޑިމާންޑުގެ ސަބަބުން ގޮންޖެހުންތަކާ ކުރިމަތިވިކަން އޭނާ ފާހަގަކުރެއްވިއެވެ.
”މިކަމުގައި އަޅުގަނޑުމެންނަށް ދިމާވި އެންމެ ބޮޑު އެއް ގޮންޖެހުމަކީ ދުނިޔޭގެ މާކެޓުގައި މި ބޯޓަށް ވަރަށް ބޮޑު ޑިމާންޑެއް އޮތް ދުވަސްވަރު އަޅުގަނޑުމެންނަށް މި މަސައްކަތް ކުރެވެމުންދަނީ. އެހެންކަމުން އެއަރކްރާފްޓު އެވޭލަބިލިޓީ ވަރަށް ބޮޑަށް ލިމިޓްކޮށް ހުރީ. ހާއްސަކޮށް އަޅުގަނޑުމެން ޗޫޒްކުރި ވައިޑްބޮޑީ. އެހެންވީމަ ލަސްތަކެއް އައިސްފަ މިވަނީ،“ – އިޔާސް ވިދާޅުވިއެވެ.
އިޔާސް ވިދާޅުވި ގޮތުގައި، އެއަރބަސް ކުންފުންޏާއެކު ކުރެވުނު މަސައްކަތުގެ ދަށުން އުންމީދީ ނަތީޖާއެއް މިހާރު ލިބިފައިވާއިރު، މި އަހަރުގެ ފަހުކޮޅު ދެވަނަ މަތިންދާބޯޓު ލިބުމާއެކު ބައިނަލްއަގްވާމީ އާ މަންޒިލްތަކަށް ދަތުރުތައް ފެށިގެންދާނެ ކަމަށެވެ. އެގޮތުން ރަޝިޔާއާއި ދެކުނު ކޮރެއާއަށް ސީދާ ދަތުރުތައް ފެށުމަށް ވާންޖެހޭ އެންމެފަހުގެ ތައްޔާރީތައް މިހާރު އަންނަނީ ވަމުންނެވެ.
މޯލްޑިވިއަންއިން މިހާރު ގެންގުޅޭ އެއަރބަސް އޭ 330-200 މަރުކާގެ ވައިޑް ބޮޑީ މަތިންދާބޯޓަކީ ޖުމުލަ 264 ފަސިންޖަރުންގެ ޖާގައިގެ މަތިންދާބޯޓެކެވެ. މި މަތިންދާބޯޓުގައި ޗައިނާ، އިންޑިއާ، ބަންގްލަދޭޝްގެ އިތުރުން އޮސްޓްރޭލިއާއަށް ވަނީ ދަތުރުތައް ފަށައިފައެވެ. މީގެ އިތުރުން ޙައްޖާއި ޢުމްރާގެ ދަތުރުތަކުގައި ވެސް މި މަތިންދާ ބޯޓު ބޭނުންކުރަމުން އަންނަކަން ފާހަގަކޮށްލަންޖެހެއެވެ.
މި ސަރުކާރުގެ އަމާޒަކީ ގައުމީ އެއަރލައިންގެ ހިދުމަތް ދުނިޔޭގެ އެކި ކަންކޮޅުތަކަށް ފުޅާކޮށް، ރާއްޖޭގެ ފަތުރުވެރިކަން މިހާރަށްވުރެ ބޮޑަށް ފުޅާކުރެވޭނެ ގޮތްތައް ހޯދައި މިހާރަށްވުރެ ގިނަ ފަތުރުވެރިން ރާއްޖެއަށް ގެނައުމުގެ މަސައްކަތް ކުރުމެވެ.
