ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އިސްނެންގެވުމާއެކު ފެއްޓެވި ”ދިވެހި ވަޠަނީ ޚިދުމަތުގެ ފަންނީ ތަމްރީން“ ޕްރޮގްރާމްގެ ފުރަތަމަ ބުރުގެ ދަރިވަރުން މިއަދު ދަސްވެނިވުމާ ގުޅިގެން، އެ ތަމްރީން ފުރިހަމަކުރި ކުއްޖެއްގެ މަންމައަކު ރައީސަށް ނުހަނު އިޚްލާޞްތެރިކަމާއެކު ޝުކުރު އަދާކޮށްފިއެވެ.
ސޯޝަލް މީޑިއާގައި އާންމުކުރި ޝުޢޫރުތަކެއްގައި މި މަންމަ ބުނެފައިވަނީ، މިއަދަކީ ދިވެހި ޒުވާނުންގެ މުސްތަޤްބަލަށްޓަކައި ރައީސުލްޖުމްހޫރިއްޔާ ގެންގުޅުއްވާ ހަރުދަނާ ތަޞައްވުރުގެ ދަށުން ފެއްޓެވި މި މުހިންމު ޕްރޮގްރާމްގެ ފުރަތަމަ ބުރުގެ ދަރިވަރުން މުޖުތަމަޢަށް ނުކުންނަ އުފާވެރި ދުވަސް ކަމަށެވެ. އަދި މިފަދަ އަގުހުރި ފުރުޞަތުތަކެއް ޒުވާނުންނަށް ތަނަވަސްކޮށްދެއްވީތީ ރައީސް މުޢިއްޒަށް އޭނާ ވަނީ ޝުކުރު ދަންނަވާފައެވެ.
މި ޕްރޮގްރާމާ ގުޅޭގޮތުން ވާހަކަދައްކަމުން އެ މަންމަ ފާހަގަކުރި ގޮތުގައި، މިއީ ހަމައެކަނި ފަންނީ ތަމްރީނެއް ނޫނެވެ. މިއީ ދަރިންގެ ކިބައިގައި ޤައުމީ ލޯތްބާއި، އަޚްލާޤާއި، އަދި އަމިއްލަ ފައިމައްޗަށް ތެދުވުމުގެ ހިތްވަރު އާލާކޮށްދިން މުހިންމު ބިނާއެކެވެ. ވަކި މިޞްރާބެއް ނެތި ތިބި އެތައް ޒުވާނުންނަކަށް ރައީސް މިއަދު ދައްކަވައިދެއްވީ އުއްމީދުން ފުރިގެންވާ އައު މަންޒިލެއް ކަމަށްވެސް އޭނާ ބުންޏެވެ.
”އަޅުގަނޑަކީ މި ތަމްރީން ފުރިހަމަކުރި ދަރިވަރެއްގެ މަންމައަކަށް ވީތީ، އަޅުގަނޑުގެ ހިތުގައި އުފެދިފައިވާ އުފާވެރިކަމާއި ޝުކުރުވެރިކަން ބަޔާންކޮށްދޭންވެސް ނޭނގެ. އެތައް އާއިލާއަކަށް އުފާވެރިކަން ގެނެސްދެއްވައި، އަޅުގަނޑުމެންގެ ދަރިންނަށް ރަނގަޅު މުސްތަޤްބަލެއް ކަށަވަރުކޮށްދެއްވުމަށް ތިޔަ ކުރެއްވި މަތިވެރި މަސައްކަތްޕުޅަށްޓަކައި، މަންމައެއްގެ ހައިސިއްޔަތުން ފަށްފަށުން ޝުކުރު އަދާކުރަން،“ ފޭސްބުކްގައި އާންމުކުރި ލިޔުމުގައި ބުނެފައިވެއެވެ.
މީގެ އިތުރުން، މި މަސައްކަތުގެ ސަބަބުން ދިވެހި ދަރިންނަކީ ޤައުމަށް ފައިދާހުރި، ހުނަރުވެރި، އަދި ވަޠަނީ ބައެއްގެ ގޮތުގައި ފެނިގެންދާނެކަމީ ޝައްކެއް އޮތް ކަމެއް ނޫންކަން އޭނާ ފާހަގަކުރިއެވެ. އަދި ރައީސުލްޖުމްހޫރިއްޔާ ޒުވާން ޖީލަށްޓަކައި ކުރައްވަމުން ގެންދަވާ ބުރަ މަސައްކަތްޕުޅަކީ މިއަދު ދިވެހި ކޮންމެ މަންމައަކާއި ބައްޕައަކު ފަޚުރުވެރިވާނޭ ކަމެއް ކަމަށްވެސް އެ މަންމަގެ ލިޔުމުގައި ބަޔާންކޮށްފައިވެއެވެ.
މި ޕްރޮގްރާމަކީ ރައީސް ޑރ. މުޙައްމަދު މުޢިއްޒުގެ ސަރުކާރުން، ޒުވާނުން ބާރުވެރިކުރުވުމަށާއި ޤައުމީ ޚިދުމަތަށް އަހުލުވެރިކުރުވުމަށް ފަށްޓަވާފައިވާ މުހިންމު މަޝްރޫޢެކެވެ.
