ޔޫރަޕްގެ ގައުމުތަކުން ދިވެހިރާއްޖޭގައި އުފައްދާ ކަނޑުމަހުގެ ބާވަތްތަކުން ނަގާ ޓެރިފް ކަނޑާލުމާ ގުޅޭ މަޝްވަރާތައް ކުރަމުން އަންނަ ކަމަށް ފޮރިންގ މިނިސްޓަރު އިރުތިޝާމް އާދަމް ވިދާޅުވެއްޖެއެވެ.
ޔޫރަޕްގެ ގައުމުތަކުން 22 އިންސައްތައާއި 24 އިންސައްތައާއި ދެމެދުގެ ރޭޓެއްގައި ދިވެހި ކަނޑުމަހުގެ ބާވަތްތަކުން ޓެރިފެއް ނަގަމުން އާދެއެވެ. ޔޫރަޕްގެ ގައުމުތަކުން މި ޓެރިފް ނަގަން ފަށާފައިވަނީ 2011 ވަނަ އަހަރު އެންމެ ކުޑަކޮށް ތަރައްގީވެފައިވާ ގައުމުތަކުގެ ލިސްޓުން ދިވެހިރާއްޖެ އުނިވުމާ ގުޅިގެންނެވެ.
ފާހަގަކޮށްލަންޖެހޭ ގޮތުގައި، ޔޫރަޕިއަން ޔޫނިއަން (އީޔޫ) އިން އިނގިރޭސިވިލާތް ވަކިވުމާ ގުޅިގެން، ދިވެހި ސަރުކާރުން މިހާރު ދަނީ އިނގިރޭސި ބާޒާރަށާއި ޔޫރަޕްގެ ބާޒާރަށް ޓެރިފާ ނުލައި މަސް އެތެރެކުރެވޭނެ ގޮތްތަކާ މެދު ވަކިވަކިން މަޝްވަރާ ކުރަމުންނެވެ. މި މަސައްކަތުގެ ދަށުން އިނގިރޭސިވިލާތުން މިހާރު ވަނީ ދިވެހި ކަނޑުމަހުގެ ބާވަތްތަކުން ނަގަމުން އައި ޓެރިފް އެއްކޮށް ކަނޑާލައިފައެވެ.
މިނިސްޓަރު އިރުތިޝާމް ފާހަގަކުރެއްވި ގޮތުގައި، ސަރުކާރުގެ މައިގަނޑު އަމާޒަކީ އިނގިރޭސި ބާޒާރުން ލިބިފައިވާ ލުއިތަކުގެ ބޭނުން ހިފާ، ދިވެހި ކަނޑުމަހުގެ އުފެއްދުންތަކުގެ ފެންވަރު މިހާރަށްވުރެ ބޮޑަށް މަތިކޮށް، ބޭރުގެ ބާޒާރުތަކަށް ފޮނުވާ މިންވަރު އިތުރުކުރުމެވެ.
މީގެ އިތުރުން ބައިނަލްއަގްވާމީ ބާޒާރުގައި ދިވެހި ކަނޑުމަހުގެ ބާވަތްތަކަށް އެންމެ އެކަށީގެންވާ ރަނގަޅު އަގު ހޯދައިދިނުމަށް ސަރުކާރުން މެދުކެނޑުމެއްނެތި މަސައްކަތްކުރާނެކަމުގެ ޔަގީންކަން ވެސް އެކަމަނާ ވަނީ ދެއްވައިފައެވެ.
