ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ 4،000 ފުލެޓް ހިމެނޭ ސަރަހައްދުގެ މަގުތައް ތަރައްގީކުރުމުގެ މަޝްރޫއު މި އަހަރުގެ ނިޔަލަށް އެއްކޮށް ނިންމާނެ ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެ ސަރަހައްދުގެ މަގުތައް ތަރައްގީކުރުމުގެ މަޝްރޫއުގެ ދަށުން، ޒޯން 1 އިން ފެށިގެން ޒޯން 6 އާއި ހަމައަށް ހުރިހާ ޒޯނެއްގެ މަގުތަކުގައި ގާ އެތުރުމުގެ 95 އިންސައްތަ މަސައްކަތް މިހާރު ނިމިފައިވާކަން ފާހަގަކުރަމުން އެޗްޑީސީން ބުނެފައިވަނީ، ހުޅުމާލެ ދެވަނަ ފިޔަވަހީގެ ރީތިގަސް މަގު ހިމެނޭ ޒޯން 7 ގެ މަސައްކަތުގެ 35 އިންސައްތަ މިހާރު ނިމިފައިވާ ކަމަށެވެ.
އެޗްޑީސީން ބުނީ، މަގު ބައްތި ހަރުކުރުމުގެ 85 އިންސައްތަ މަސައްކަތް ނިންމާލެވިފައިވާ ކަމަށާއި މަގުތަކުގެ ދުވާރާއި އުޅަނދުތައް ޕާކުކުރާ ސަރަހައްދުތަކުގެ މަސައްކަތް ހަލުވި ދުވެލީގައި ކުރިއަށްދާ ކަމަށެވެ.
އެފްޑީސީން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ 4،000 ފުލެޓުގެ ތެރޭގައި ހިމެނެނީ 17 ފަންގިފިލާގެ 32 ޓަވަރެވެ. އެއީ އަމާން ދޯދީގެ 16 ޓަވަރާއި އަމާން އުދަރެސްގެ 16 ޓަވަރެވެ. އެ ސަރަހައްދަކީ ގިނަ އާއިލާތަކެއް މިހާރު ވެސް ދިރިއުޅޭ ސަރަހައްދެއް ކަމަށްވުމުން އެ ސަރަހައްދުގެ މަގުތައް ހަލުވި ދުވެއްޔެއްގައި ނިންމުމަކީ އެޗްޑީސީގެ އަމާޒެކެވެ.
