މި އަހަރުގެ އަޟްޙާ ޢީދުގެ މުނާސަބަތުގައި އިސްލާމީ ގައުމުތަކުގެ އިސްވެރިންނާއި، ބައިނަލްއަގްވާމީ އިސްލާމީ ޖަމާއަތްތަކުގެ ވެރިންނަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތަހުނިޔާ އާއި ހެޔޮއެދުންތައް ފޮނުއްވައިފިއެވެ.
ރައީސް މުޢިއްޒު ފޮނުއްވި މެސެޖުތަކުގައި، އަޟްޙާ ޢީދުގެ ތަހުނިޔާއާއި ހެޔޮއެދުންތައް ފޮނުއްވުމަކީ، އެމަނިކުފާނަށް ލިބިވަޑައިގަންނަވާ އުފާފުޅެއް ކަމަށް ފާހަގަކުރައްވާފައިވެއެވެ. އަދި އެމަނިކުފާނާ އެކުގައި، ދިވެހި ސަރުކާރާއި، ރާއްޖޭގެ ރައްޔިތުން ވެސް، އެ ގައުމުތަކުގެ ވެރިންނަށާއި، ސަރުކާރުތަކަށާ، އަހްވަންތަ ރައްޔިތުންނަށް މި އުފާވެރި މުނާސަބަތުގެ ހެޔޮއެދުމާއި ތަހުނިޔާ ފޮނުއްވާ ކަމަށް ވިދާޅުވެފައިވެއެވެ.
މި ޢީދާ ގުޅިފައިވާ ރޫހާނީ މުހިއްމުކަމުގެ މައްޗަށް ބައްލަވާލައްވައި، ޢީދާއެކުގައިވާ، އަޅުކަމުގެ އަގުތަކާއި، ގްރްބާންކުރުމާއި، އެއްބައިވަންތަކަން އަދި ރަހްމަތުގެ ސަބަބުން، މުސްލިމު އުއްމަތުގެ މެދުގައިވާ ގުޅުންތައް އިތުރަށް ބަދަހިވެގެންދާކަން ރައީސް ވަނީ ފާހަގަކުރައްވައިފައެވެ.
މި މުނާސަބަތުގެ ސަބަބުން، ދުނިޔޭގެ މުސްލިމުން އެއްބަޔަކު އަނެއް ބަޔަކުގެ ހާލަތު ދެނެގަތުމާއި، އަޅާލުމާއި، އަދި އެއްބައިވަންތަކަން ބަދަހިވެގެން ދިޔުމަށާއި، ޙައްޖުގެ އަޅުކަން އަދާކުރަމުން ގެންދަވާ އެންމެހާ ޙައްޖާޖީންނަށް މަބްރޫރް ޙައްޖަކަށް އެދިވަޑައިގެން، އަމާންކަމާއި ސަލާމަތްކަން ދެއްވުމަށް އެދިވަޑައިގެން ރައީސް ވަނީ ދުއާކުރައްވައިފައެވެ.
މެސެޖުތައް ނިންމަވާލައްވަމުން، ރައީސް ވަނީ، ގައުމުތަކުގެ ލީޑަރުންނަށް، ދުޅަހެޔޮ ސިއްހަތަކަށާއި ފާގަތިކަމަށް އެދިވަޑައިގެން، ހެޔޮއެދުންތައް ފޮނުއްވައިފައެވެ. މީގެ އިތުރުން، އެ ބޭފުޅުންނަށް އިތުރު ކުރިއެރުމާއި، އުފާވެރިކަން މިންވަރު ކުރެއްވުމަށް އެދިވަޑައިގެން ވެސް އެމަނިކުފާނު ވަނީ ދުއާ ކުރައްވައިފައެވެ.
