މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ އުފެއްދުންތައް އަތޮޅުތެރޭގެ ރައްޔިތުންނަށް ފަސޭހައިން ފޯރުކޮށްދިނުމަށް ކުރަމުންދާ މަސައްކަތުގެ ދަށުން، އައްޑޫ ސިޓީގައި އެ ކުންފުނީގެ މަސްފިހާރައެއް ހުޅުވައިފިއެވެ.
އައްޑޫ ސިޓީ ހިތަދޫގައި ގާއިމުކޮށްފައިވާ މި ފިހާރަ ހުޅުވައިދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ޔޫތް މިނިސްޓަރު ޢަބްދުﷲ ރާފިޢުއެވެ.
މިފްކޯގެ މަސްފިހާރަ ހުޅުވުމަށް އައްޑޫ ސިޓީގައި ބޭއްވި ރަސްމިއްޔާތުގައި ވާހަކަދައްކަވަމުން މިފްކޯގެ މެނޭޖިންގެ ޑިރެކްޓަރު މުޙައްމަދު އަނަސް ވިދާޅުވީ، އައްޑޫ ސިޓީއަކީ މަސްވެރިކަމުގެ ސިނާއަތުގައި މުހިންމު ދައުރެއް އަދާކުރާ، މިފްކޯއާ ވަރަށް ގާތް ގުޅުމެއް ބާއްވާ ސިޓީއެއް ކަމަށެވެ. މި ފިހާރައިގެ ސަބަބުން އެ ސިޓީގެ ރައްޔިތުންނަށް މިފްކޯގެ އުފެއްދުންތައް މެދުނުކެނޑި، ހެޔޮ އަގުގައި ލިބޭނެ މަގު ތަނަވަސްވެގެންދާނެ ކަމަށް ވެސް އޭނާ ވަނީ ވިދާޅުވެފައެވެ.
އަނަސް ވިދާޅުވި ގޮތުގައި، ހުޅުމީދޫގައި ހުންނަ އައްޑޫ ފިޝަރީޒް ކޮމްޕްލެކްސް މެދުވެރިކޮށް އުފައްދާ ތަކެތި ސީދާ މި ފިހާރައިން ލިބެން ހުރުމުން، ލޯކަލް ޕްރޮޑަކްޝަން ފުޅާކުރުމަށް ބޮޑު ބާރަކަށް ވެގެންދާނެއެވެ.
މިފްކޯއިން މައުލޫމާތުދޭ ގޮތުގައި ފިހާރައިން މިފްކޯގެ ތަފާތު ބާވަތްތަކުގެ ދަޅުމަހާއި، ޕެކެޓް ކުރި މަހުގެ އުފެއްދުންތައް ލިބެން ހުންނާނެއެވެ. މިއީ މި ސަރުކާރުން މަސްވެރިކަމުގެ ސިނާއަތް ކުރިއަރުވައި، ރައްޔިތުންނަށް ބޭނުންވާ އަސާސީ ހިދުމަތްތައް ފަސޭހަކޮށްދިނުމުގެ ގޮތުން ކުރިއަށްގެންދާ މަސައްކަތްތަކުގެ ތެރެއިން މަސައްކަތެއް ކަމަށް މިފްކޯއިން ވަނީ ބުނެފައެވެ.
