ނުރަސްމީ ދަތުރުފުޅެއްގައި ރައީސް ޑރ. މުޙައްމަދު މުޢިއްޒު ސިންގަޕޫރަށް ވަޑައިގަތީ އާއިލާއާއެކު ޗުއްޓީ ހޭދަކޮށްލެއްވުމަށް ކަމަށް ވިދާޅުވެ، ކުރީގެ ރައީސް މުހައްމަދު ނަޝީދު ދެއްކެވި ވާހަކަތައް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ދޮގުކުރައްވައިފިއެވެ.
ރައީސް މުޢިއްޒު ސިންގަޕޫރަށް ވަޑައިގަތީ ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމާ ބައްދަލުކުރެއްވުމަށް ކަމަށާއި، ނަމަވެސް ނާޒިމް، އެމަނިކުފާނާ ވާހަކަދައްކަފާނެ ކަމަށް ނުބެއްލެވޭ ކަމަށް ނަޝީދު ވަނީ ވިދާޅުވެފައެވެ. ނަޝީދުގެ މި ވާހަކަތަކަށް ރައްދުދެއްވަމުން މުންދު ވިދާޅުވީ، ރައީސް ސިންގަޕޫރަށް ވަޑައިގަތީ އާއިލާއާއެކު ޗުއްޓީ ހޭދަކޮށްލެއްވުމަށް ކަމަށެވެ.
މީގެ އިތުރުން ހަގީގަތާ ހިލާފު ދޮގު ވާހަކަތައް އެއްވެސް ފަރާތަކުން ނުފެތުރުމަށް މުންދު ވަނީ އެދިވަޑައިގެންފައެވެ.
ނަޝީދު މި މޭރުމުން މަޖިލީހުގެ ނައިބު ރައީސްކަމުން ނާޒިމް ވަކިކުރަން މި މަހުގެ 13 ވަނަ ދުވަހު ޕީއެންސީގެ ޕާލިމަންޓްރީ ގްރޫޕުން ވަނީ ނިންމައިފައެވެ. އެ ޕާޓީން މައުލޫމާތުދޭ ގޮތުގައި މަޖިލީހުގެ ނައިބު ރައީސްކަމުން އިސްތިއުފާ ދިނުމަށް ނާޒިމަށް އެންގި ނަމަވެސް އޭނާ ވަނީ އެކަމަށް ދެކޮޅު ހަދައިފައެވެ. އެ މަގާމުން އޭނާ ވަކިކުރަން ނިންމީ މަގާމުގެ ނުފޫޒުން ނާޖާއިޒު ފައިދާ ނަގައި، ފިތުނަ އުފައްދައި، މަޖިލީހުގެ މަސްލަތު ނަގާލަން މަސައްކަތްކޮށްފައިވާކަމުގެ ތުހުމަތުގައެވެ.
މީގެ އިތުރުން، މަޖިލީހުގެ މެންބަރުންނަށް މަތިކޮށްފައިވާ ވާޖިބުތައް އަދާކުރުމަށް ނާޒިމުގެ ސަބަބުން ހުރަސްތަކާ ކުރިމަތިވާ ކަމަށް ޕީއެންސީން ތުހުމަތުކުރެއެވެ.
މިކަމާ ގުޅިގެން ނަޝީދު ވިދާޅުވަމުން ގެންދަވަނީ މަޖިލީހުގެ ނައިބު ރައީސް ކަމުން ނާޒިމް ވަކިކުރަން ޕީއެންސީގެ މެންބަރުން މަސައްކަތް ކުރައްވަނީ، ނާޒިމާއެކު ޕީއެންސީގެ 23 މެންބަރަކު ޕާޓީ ބަދަލުކުރައްވައި، ރައީސްގެ މައްޗަށް އިތުބާރު ނެތްކަމުގެ ވޯޓެއް ނަގަން އުޅުއްވާތީ ކަމަށެވެ. ނަޝީދުގެ އެ ވާހަކަތަކަށް ރައްދުދެއްވަމުން މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ، މަޖިލީހުގެ ތެރެއިން ރައީސްގެ އިތުބާރު ނެތްކަމުގެ ވޯޓު ނެގުނަ ނުދޭނެ ކަމަށެވެ.
