ފުޓުބޯޅައިގެ ތެރެއިން އަހްލާގާއި ޓީމް ވޯކްގެ އިތުރުން ގަވާއިދާ އުސޫލުތަކުގެ މުހިއްމުކަން ދަސްކޮށްދޭ ކަމަށް ރައީސުލްޖުމްހޫރިއްޔާގެ އަނބިކަނބަލުން، ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.
މެޑަމް ސާޖިދާ މި މޭރުމުން ވިދާޅުވީ، ދުނިޔޭގެ ފުޓްބޯޅަ ދުވަހުގެ މުނާސަބަތާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެކަމަނާ ވިދާޅުވީ، ފުޓުބޯޅައަކީ ރާއްޖޭގެ ކޮންމެ ރަށެއްގައި ވެސް ދިވެހިންގެ ހިތްތަކާ ގުޅިފައިވާ ކުޅިވަރެއް ކަމަށެވެ.
ފުޓްބޯޅައަކީ ހަމައެކަނި ކުޅިވަރަކަށްވުރެ ބޮޑަށް ހުރިހާ އުމުރުފުރައެއްގެ މީހުން އެއްތަނަކަށް އެއްވެ، ދުޅަހެޔޮ، މުޖުތަމައުގައި އުފާވެރި ދިރިއުޅުމެއް އުޅުމަށް ހިތްވަރުދޭ ”ޔުނިވަރސަލް ބަހެއް“ ކަން ފާހަގަކުރައްވަމުން މެޑަމް ސާޖިދާ ވިދާޅުވީ، އެ ކުޅިވަރަކީ އަހްލާގާއި ޓީމް ވޯކްގެ އިތުރުން ގަވާއިދާ އެއްގޮތަށް ކުޅުމުގެ މުހިއްމުކަން ދަސްކޮށްދޭ ކުޅިވަރެއް ކަމަށެވެ.
ދުނިޔޭގެ ފުޓުބޯޅައިގެ ދުވަސް ފާހަގަކުރަމުންދާއިރު ފުޓްބޯޅަ ފަދަ ކުޅިވަރުތަކުގެ ތެރެއިން، ސުލްހަމަސަލަސްކަން ގާއިމުކޮށް، މުޖުތަމައެއްގައި ދޭދޭ ގުޅުންތައް ވަރުގަދަކޮށް، ޒުވާނުންނަށް ފަހި މުސްތަގްބަލެއް ބިނާކުރުމަށް ހިތްވަރުދިނުމަކީ ވަރަށް މުހިއްމު ކަމެއް ކަމަށް މެޑަމް ސާޖިދާ ވިދާޅުވިއެވެ.
ދުނިޔޭގެ ފުޓުބޯޅައިގެ ދުވަސް ފާހަގަކުރަމުން ދަނީ ކޮންމެ އަހަރެއްގެ ވެސް މެއި މަހުގެ 25 ވަނަ ދުވަހުއެވެ.
