ދިވެހިރާއްޖޭގެ ސިޔާސީ މަސްރަހަކީ އަބަދުވެސް ހަލަބޮލި އަދި އެހާމެ ބަދަލުވަމުންދާ މާހައުލަކަށް ވެފައިވާއިރު، ރާއްޖޭގެ އެންމެ ބޮޑު އިދިކޮޅު ޕާޓީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ އެތެރޭގެ ބައިބައިވުންތައް މިވަނީ އަނެއްކާވެސް ބޮޑުވެ،
އެމްޑީޕީގެ އެންމެ އިސް ނިންމުންތައް ނިންމާ ”ގައުމީ މަޖިލިސްގެ ވަޓަސް ގްރޫޕުން ލީކުވެފައިވާ ސްކްރީންޝޮޓްތަކަކުން ހާމަވާ ގޮތުގައި، ޕާޓީގެ އެތެރޭގައި ބާރުވެރިކަމުގެ ވާދަވެރިކަން ވަނީ އިންތިހާއަށް ގޮސްފައެވެ. މި ލީކުވި ޗެޓް ލޮގްތަކުގައި ޕާޓީގެ ކުރީގެ ރައީސް މުހައްމަދު ނަޝީދު ވަނީ ޕާޓީގެ އެތެރޭގެ ވާދަވެރިކަމާ ގުޅޭގޮތުން ވަރަށް ހަރުކަށި ބަހުގެ ހަމަލާތަކެއް ދެއްވާފައެވެ.
މި ހޫނު ބަހުސް ފެށިގެން އައީ ގައުމީ މަޖިލިސް ގްރޫޕުގައި ހިމެނޭ އެ ޕާޓީގެ މާލެ ސިޓީ ކައުންސިލް މެންބަރެއް ކަމަށްވާ ހައްޖަ ކުރި މެސެޖަކާ ގުޅިގެންނެވެ. އޭނާ ބުނެފައިވަނީ، ”އަހަރުމެން މިތިބީ ގަދަވާ މީހާ ފަހަތުގައި ހުންނަން“ ކަމަށެވެ. މިއަށް ރައްދު ދެއްވަމުން ރައީސް ނަޝީދު ވިދާޅުވެފައިވަނީ، ޕާޓީގެ ކަންކަމުގައި ބަލިވާ ބޭފުޅުން ފަހަތުގައި ތިއްބަވާއިރު، ”ތަންކޮޅެއް ދުރުގައި“ ތިއްބަވާނެ ކަމަށް އުންމީދު ކުރައްވާ ކަމަށެވެ. އަދި ކައިރީގައި ތިއްބަވަން ޖެހޭނީ މޮޅުވާ ބޭފުޅުން ކަމަށްވެސް އެމަނިކުފާނު ފާހަގަކުރެއްވިއެވެ.
މި ވާހަކައަށް ރައްދު ދެއްވަމުން ޕާޓީގެ ފާހަގަކޮށްލެވޭ ގާނޫނީ ވަކީލު މަހްފޫޒް ސައީދު ވަނީ އެއީ ކިހާ ދުރެއްގަތޯ އަދި އެހެން އެކަން ކުރަންވީ ކީއްވެގެންތޯ ސުވާލު ކުރައްވާފައެވެ. މަހްފޫޒް ވިދާޅުވީ އިންތިޚާބެއް ކާމިޔާބު ވަނީ ވަރަށް ގިނަ ބައެއްގެ މަސައްކަތުން ކަމަށާއި، ކާމިޔާބުވުމަށްފަހު ކުރިން މަސައްކަތް ކުރި މީހުން ފަހަތަށް ޖެއްސުމަކީ އިންސާފެއް ނޫން ކަމަށެވެ. އަދި ބިރުދައްކައިގެން ނޫޅުމަށާއި ވާދަކޮށްގެން އިންތިޚާބު ކާމިޔާބު ކުރާ ޗެއާޕާސަނަކާ އެކު މަސައްކަތް ކުރަން ބޭނުންވާ އެންމެނަށް އެ ފުރުސަތު އޮންނަންވާނެ ކަމަށް މަހްފޫޒް ވިދާޅުވިއެވެ.
”ތާއީދު ނުކުރާ މީހާ ހެޔޮއަރުވާލާ ވިސްނުން ކަމަކުނުދޭ“ ކަމަށް ވިދާޅުވަމުން މަހްފޫޒް އިތުރަށް ފާހަގަކުރެއްވީ، ޕާޓީގެ މަގާމުތަކަށް ކުރިމަތިލާއިރު ތާއީދުކުރާ މީހުންނާއި ނުކުރާ މީހުން ތިބޭނެ ކަމަށެވެ. ނަމަވެސް، މަގާމަށް ހޮވުމަށްފަހު ތާއީދު ނުކުރާ މީހާ ”ހެޔޮއަރުވާލާ“ ނުވަތަ އެކަހެރިކޮށްލާ ވިސްނުމަކީ ކަމަކުދާނެ ވިސްނުމެއް ނޫން ކަމަށް އޭނާ ވިދާޅުވިއެވެ.
މިކަމަށް ރައްދު ދެއްވަމުން ރައީސް ނަޝީދު ވިދާޅުވީ އެންމެން ގޮވައިގެން އުޅެވޭނީ ”ސާފު ހަދައިގެން“ ނުވަތަ ވަކި އުސޫލެއްގެ މަތިން ކަމަށެވެ. އަދި ޕާޓީގެ އެތެރޭގައި ދާއިމީކޮށް ދެބަސްވުންތަކާއި އަރާރުންތައް އޮތުމަކީ ރަނގަޅު ގޮތެއް ނޫން ކަމަށާއި، ޕާޓީގައި ވަރުގަދަ ލީޑާޝިޕަކާއި އޮނިގަނޑެއް އޮންނަން ޖެހޭނެ ކަމަށް އެމަނިކުފާނު ވިދާޅުވިއެވެ. މި ބަހުސްގެ ތެރެއިން ނަޝީދު ވަނީ މަހްފޫޒަށް ސީދާ އަމާޒުކޮށް، ”މަހްފޫޒް ވެސް މިކޮޅަށް ނާރައިފި ނަމަ ހުންނަވަން ރަނގަޅު ވާނީ ފަހަތުގައި“ ކަމަށް ވިދާޅުވެ، ބޮޑު އިންޒާރެއް ދެއްވާފައެވެ.
މި ބަހުސް ނިންމާލަމުން މަހްފޫޒް ސައީދު ވިދާޅުވީ، މިއީ ޕާޓީގެ އެތެރޭގެ އިންތިޚާބެއް ކަމަށާއި، އެންމެންގެ އަމާޒަކަށް ވާންޖެހޭނީ 2028 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ކާމިޔާބު ކޮށްދިނުން ކަމަށެވެ. މި ލީކުވި މެސެޖުތަކުގެ ސަބަބުން އެމްޑީޕީގެ އެތެރޭގެ އެއްބައިވަންތަކަމާ މެދު މިވަނީ ބޮޑެތި ސުވާލުތަކެއް އުފެދިފައެވެ.
