ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުނުވާ އެއްވެސް ކަމެއް އެ ޕާޓީގެ ތެރޭގައި ނުހިނގާނެ ކަމަށާއި އެއަށްވުރެ ބޮޑަށް އެމަނިކުފާނު ދެކެ ޕާޓީގެ މެންބަރުން ލޯބިވާ ކަމަށް ރައްޔިތުންގެ މަޖިޅީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާޙު ވިދާޅުވެއްޖެއެވެ.
ފަލާޙު މި މޭރުމުން ވިދާޅުވީ, ޕީއެންސީގެ ސެނެޓުން ރައީސް މުޢިއްޒުގެ ހުށަހެޅުއްވުމެއް ބޭރުކޮށްލައި، އެމަނިކުފާނުގެ ނުފޫޒު ކުޑަކޮށްފި ކަމަށް ބުނެ ”އަދަދު“ ނޫހުން ފެތުރި ހަބަރަކާ ގުޅިގެން މީސް މީޑިއާގައި ހިއްސާ ކުރެއްވި ޕޯސްޓެއްގައެވެ.
”އަދަދު“ ނޫހުން ޝާއިއު ކޮށްފައިވާ އެ ހަބަރުގައިވާ ގޮތުން، ދާދި ފަހުން ބޭއްވި ޕީއެންސީގެ ސެނެޓު ބައްދަލުވުމުގައި ޕާޓީގެ ހުރިހާ އިންތިޒާމުތަކެއް ކުރިއަށް ގެންދިޔުމުގެ ފުރިހަމަ ބާރު ލީޑަޝިޕަށް ދިނުމަށާއި، ލީޑަޝިޕުން ބޭނުންވާ ގޮތަކަށް އެ ކަންކަން ނިންމުމަށް ރައީސް މުޢިއްޒު ހުށަހެޅުއްވި ނަމަވެސް، ސެނެޓުގެ އަގުލަބިއްޔަތުން ރައީސްގެ މި ހުށަހެޅުއްވުމަށް ތާއީދު ނުލިބުނު ކަމަށެވެ.
ފަލާޙު ވިދާޅުވީ، ”އަދަދު“ ނޫހުން ޕީއެންސީއާ ގުޅުވައިގެން ފަތުރަމުން ގެންދަނީ ކަނޑައެޅިގެން ހަގީގަތާ ހިލާފު ދޮގު ވާހަކަތަކެއް ކަމަށެވެ. އަދި ރައީސް މުޢިއްޒު ބޭނުންފުޅުނުވާ އެއްވެސް ކަމެއް އެ ޕާޓީގެ ސެނެޓުގައި އަދި ލީޑަރޝިޕުގައި ވެސް ނުހިނގާނެ ކަމަށް އޭނާ ވިދާޅުވިއެވެ.
”މިއީ ކަނޑައެޅިގެން ދޮގު ހަބަރެއް ރައީސް މުޢިއްޒު ބޭނުނުންފުޅުނުވާ އެއްވެސް ކަމެއް ޕީއެންސީ ސެނެޓްގައި އަދި ލީޑަރޝިޕްގައި ވެސް ނުހިނގާނެ. އެއަށްވުރެ ރައީސް މުޢިއްޒު ދެކެ އަޅުގަނޑުމެން އެންމެން ލޯބިވޭ. އެމަނިކުފާނަށް އަޅުގަނޑުމެން އެންމެން އިތުބާރުކުރަން. މިހެން މިކަން އޮތް ނަމަވެސް ރައީސް މުޢިއްޒު އިސްކުރައްވަނީ ޕާޓީގެ އަސާސީ ގަވައިދާއި ހެދިފައިވާ އުސޫލުތަށް އަދި މަޝްވަރާގެ ރިވެތި ސިފަ،“ – ފަލާޙު ވިދާޅުވިއެވެ.
ފަލާޙު ވިދާޅުވީ، ނިމިގެންދިޔަ ޕީއެންސީ ސެނެޓް ބައްދަލުވުމުގައި ވަކި ކަމެއް ވަކި ގޮތަކަށް ކުރައްވަން ރައީސް މުޢިއްޒު ހުށަނާޅުއްވާ ކަމަށެވެ. މުޅި ބައްދަލުވުމުގައި ވެސް ހުރިހާ ކަމެއް ހުށަހެޅުއްވީ ސެނެޓް މެންބަރުންނަށް ފެނިވަޑައިގަންނަވާ ގޮތަކަށް ނިންމެވުމަށް ކަމަށް އޭނާ ވިދާޅުވިއެވެ.
މިި ހަބަރުން ސާފުވީ އަދަދު ނޫސް ފަދަ ބައެއް ނޫސްތަކާއި ބައެއް ފަރާތްތަކުން ލަނޑުދޭ މިންވަރުކަން ފާހަގަކުރައްވަމުން ފަލާޙު ވިދާޅުވީ، ފައިސާދީގެން މިފަދަ ނޫސްތަކުގައި ނޫސްވެރިން ލައްވާ ކޮންމެ ފަދަ ބޮޑެތި ދޮގު ވާހަކަތަކެއް ވެސް ލިޔުއްވިދާނެ ކަމަށެވެ. ފަލާޙު އިތުރަށް ވިދާޅުވީ، ރައީސް މުޢިއްޒަކީ ފަހުގެ ތާރީހެއްގައި ރާއްޖެ ދުށް، ރައްޔިތުންގެ މަޝްވަރާއާއި ލަފާހޯއްދަވައިގެން ވެރިކަންކުރެއްވި ހަމައެކަނި ރައީސް ކަމަށެވެ.
