ޙައްޖުގެ މަަތިވެރި އަޅުކަން އަދާކުރުމަށް މި އަހަރު ރާއްޖެއިން ފުރި ހުރިހާ ޙައްޖާޖީން ވެސް މިހާރު މިނާއަށް ގޮސްފައިވާ ކަމަށް އިސްލާމިކް މިނިސްޓްރީން ބުނެފިއެވެ.
ދިވެހި ޙައްޖާޖީން މިނާއަށް ދިއުމަށް ދަތުރު ފަށާފައިވަނީ ވަނީ ރޭ 21:30 އިން ފެށިގެންނެވެ. އަދި މިނާގައި ރޭ ކުރުމަށްފަހު، ހުރިހާ ޙައްޖާޖީން ވެސް މިރޭ އަރަފާތަށް ދިއުމަށް ތައްޔާރުވާނެއެވެ.
ދިވެހި ޙައްޖާޖީންނާ ގުޅޭ އެންމެފަހުގެ މައުލޫމާތު ހިއްސާކުރަމުން އިސްލާމިކް މިނިސްޓަރު ޑރ. ޝަހީމް ވިދާޅުވީ، މި އަހަރަކީ ދިވެހި ޙައްޖާޖީންނަށް އެންމެ މަތީ ހިދުމަތާއި އެހީތެރިކަން ހައްޖު ކޯޕަރޭޝަނުން ފޯރުކޮށްދެމުން އަންނަ އަހަރު ކަމަށެވެ. އެގޮތުން މިނާ އާއި އަރަފާތުގެ ހުރިހާ އިންތިޒާމުތަކެއް ވެސް ވަރަށް ފުރިހަމައަށް ހަމަޖައްސާފައިވާ ކަމަށް މިނިސްޓަރު ވިދާޅުވިއެވެ.
މިނާގައި ރޭ ކުރުމުގައި އަބަދު ވެސް ދިވެހި ޙައްޖާޖީންނަށް ބޮޑެތި ތަކުލީފުތަކާ ކުރިމަތިލާންޖެހެއެވެ. ނަމަވެސް ސައުދީ ސަރުކާރާއެކު ދިވެހި ސަރުކާރުން ކޮށްފައިވާ މަޝްވަރާތަކާ ގުޅިގެން މިދިޔަ 2025 ވަނަ އަހަރުން ފެށިގެން މިނާގައި ދިވެހިން ތިބޭ ސަރަހައްދު ބަދަލުކޮށް، ކެޓަގަރީ ވަނީ މަތިކޮށްފައެވެ.
މި އަހަރު ވެސް ދިވެހިރާއްޖެއިން 1،000 މީހުން ޙައްޖުގެ މަތިވެރި އަޅުކަމަށް ސަޢުދީއަށް ގޮސްފައިވެއެވެ. ޖުމުލަ ގޮތެއްގައި ހުރިހާ ޙައްޖާޖީންގެ ހާލު ރަނގަޅު ކަމަށް އިސްލާމިކް މިނިސްޓްރީން ބުންޏެވެ.
