ޗައިނާގައި ހިނގި ގޭސް އެކްސްޕްލޯޝަންގެ ހާދިސާއާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިޔާގެ މެސެޖެއް ފޮނުއްވައިފިއެވެ.
ޗައިނާގެ ރައީސް ޝީ ޖިންޕިންގއަށް ފޮނުއްވެވި މެސެޖެއްގައި ރައީސް ވަނީ، މި ނުރައްކާތެރި ހާދިސާގައި ގިނަ ބަޔަކު މަރުވެ އަދި އެތައް ބަޔަކަށް އަނިޔާ ލިބިފައިވާކަން ފާހަގަކުރައްވައި، އެކަމާ ހިތާމަފުޅުކުރައްވާ ކަމަށް ވިދާޅުވެފައެވެ. އަދި މި ހާދިސާގައި މަރުވި މީހުންގެ އާއިލާތަކަށާއި، ޗައިނާ ސަރުކާރުގެ އިތުރުން އެ ގައުމުގެ ރައްޔިތުންނަށް، ދިވެހި ސަރުކާރާއި ރައްޔިތުންގެ ނަމުގައި ތައުޒިޔާ ފޮނުއްވާ ކަމަށް ރައީސް ވިދާޅުވިއެވެ.
ހިތާމައިގެ މި ދަނޑިވަޅުގައި ދިވެހިރާއްޖެ ޗައިނާއާއި އެކުގައިވާކަން ފާހަގަކުރައްވައި، މި ހާދިސާގައި ގެއްލުން ލިބުނު ހުރިހާ ފަރާތްތަކަށް، ކެތްތެރިކަމާ ސާބިތުކަން ދެއްވުމަށާއި، މީހުން ސަލާމަތްކުރުމަށް ކުރެވެމުންދާ މަސައްކަތަށް ކާމިޔާބު ލިބުމަށް ވެސް ރައީސް އެދިވަޑައިގަތެވެ.
ޗައިނާގެ ޝާންޝީ ޕްރޮވިންސްގެ ލިއުޝެންޔޫ ކޯލް މައިންގައި ހިނގި މި ހިތާމަވެރި ހާދިސާގައި 82 މީހަކު މަރުވެފައިވާއިރު، ހާދިސާ ހިނގި ސަރަހައްދުގައި މަސައްކަތްކުރި ދެ މީހަކު ގެއްލިފައިވާ ކަމަށް ޗައިނާގެ އިދާރާތަކުން އަންނަނީ ބުނަމުންނެވެ.
