މާލޭގެ މިސްކިތްތަކުގައި ނަމާދު ކުރާ އަޑު ތާޅަފިލިން ކަނޑާލަން އިސްލާމިކް މިނިސްޓްރީން އެންގި ކަމަށް ބުނެ ދެކެވޭ ވާހަކަ މިނިސްޓަރު ޑރ. މުޙައްމަދު ޝަހީމް ޢިަލީ ސަޢީދު ވިދާޅުވެއްޖެއެވެ.
މިނިސްޓަރު ޝަހީމް މި މޭރުމުން ވިދާޅުވީ، މަޝްހޫރު ދީނީ އިލްމުވެރިޔާ ޝެއިޚް އާދަމް ނިޝާން އިއްޔެ މީސް މީޑިއާގައި ހިއްސާކުރެއްވި ދެއްކެވި ވާހަކަތަކަކާ ގުޅިގެންނެވެ. ޝެއިޚް ނިޝާން ހިއްސާކުރެއްވި ވީޑިއޯގައި ވިދާޅުވީ މާލެ ސަރަހައްދުގެ މިސްކިތްތަކުގެ އިމާމުން، އިސްލާމިކް މިނިސްޓްރީއަށް ގެންގޮސް މިސްކިތްތަކުގައި ނަމާދުކުރާ އަޑު ތާޅަފިލިން ކަނޑާލުމަށް އެންގި ކަމަށެވެ.
މިސްކިތްތަކުގެ އަޑު ކަނޑުވާލުމަކީ ވަރަށް ހިތާމަވެރި ކަމެއް ކަމަށާއި އެގޮތުން ފުރުޤާން މިސްކިތުގައި ރޭގައި މަޣްރިބް އަދި އިޝާ ނަމާދުގައި ވެސް ނަމާދުކުރާ އަޑު ބޭރަށް ނީވޭ ކަމަށް ޝެއިޚް ވިދާޅުވިއެވެ. ޝެއިޚް ވިދާޅުވި ގޮތުގައި، މިސްކިތްތަކުން ކިޔަވާ އަޑު ދުރަށް ނީވުމުގެ ސަބަބުން އެތައް ބަޔަކު އަންނަނީ އެކަމާ ކަންބޮޑުވުން ފާޅުކޮށް ޝަކުވާ ކުރަމުންނެވެ.
”މިއަދު އެތައް ބޭފުޅެއް ވެސް ވަނީ ޝަކުވާކޮށްފައި. އެ ފަރާތްތައް އެބަތިބޭ ނަމާދުގެ އަޑު އަހާލުމަށް ދޮރުތައް ހުޅުވާލައިގެން. މުސްލިމް މުޖްތަމައެއްގައި މިއީ މިކަން ވާންވި ގޮތެއް ނޫން. މިއީ ހިތާމަވެރިކަމެއް.“ – ޝެއިހް ނިޝާން ވިދާޅުވިއެވެ.
މި މައްސަލައާ ގުޅިގެން މިނިސްޓަރު ޝަހީމް ވިދާޅުވީ، މިސްކިތްތަކުގައި ނަމާދުކުރާ އަޑު ތާޅަފިލިން ކަނޑާލަން އިމާމުންނަށް ކަމަށް ބުނެ ފަތުރަމުން އަންނަނީ ހަގީގަތާ ހިލާފު ވާހަކައެއް ކަމަށެވެ. ނަމަވެސް މިކަމާ ގުޅޭގޮތުން އިތުރު އެއްވެސް ވާހަކައެއް މިނިސްޓަރު ވިދާޅުވެދެއްވައިފައެއް ނުވެއެވެ.
