ބޮޑުތަކުރުފާނު މަގުގެ ސެގްމެންޓު 4 ގައި 500 އަށްވުރެ ގިނަ ޖާގައިގެ ޕާކިންގއެއް ތަރައްގީކުރުމަށް ހަމަޖެހިފައިވާ ކަމަށް މި މަސައްކަތް ކުރިއަށްގެންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
މި މަސައްކަތާ ގުޅޭގޮތުން އެމްޓީސީސީން ބުނެފައިވަނީ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން ކުރަންޖެހޭ ހުރިހާ މަސައްކަތްތަކެއް އަންނަ ޖޫން މަހުގެ ނިޔަލަށް އެއްކޮށް ނިންމާލުމަށް މަސައްކަތް ކުރަމުންދާ ކަމަށެވެ. މި މަސައްކަތުގެ ދަށުން ބޮޑުތަކުރުފާނު މަގުގެ ބޭންކް އޮފް ސިލޯން ކުރިމައްޗަށްވާ ގޮތަށް އޮންނަ ސަރަހައްދުގައި ސައިކަލު ޕާކުކުރުމަށް، 588 ސްލޮޓްގެ ޕާކިންގއެއް ތަރައްގީކުރަމުންދާ ކަމަށް އެ ކުންފުނިން ވަނީ މައުލޫމާތު ދީފައެވެ.
މާލޭގެ އުތުރު ފަރާތު ބޮޑުތަކުރުފާނު މަގަކީ ސަރުކާރުގެ ގިނަ އިދާރާތަކާއި، ބޭންކުތަކާއި، އަމިއްލަ ގިނަ ބައެއްގެ އޮފީސްތަކުގެ އިތުރުން ވިޔަފާރިތައް ހުންނަ ކާރޫބާރޫ ބޮޑު ސަރަހައްދެކެވެ. އަދިހަމައެހެންމެ، މާލެއަށް އަރާފައިބާ މީހުން އާންމުކޮށް ބޭނުންކުރާ އެއް ސަރަހައްދަށް އެ ސަރަހައްދުވާނެއެވެ. އެއީ ކޮންމެ ދުވަހަކު ވެސް އެތައް ބަޔަކު ބޭނުންކުރާ ސަރަހައްދަކަށްވުމުން، އެ ސަރަހައްދު ތަރައްގީކުރުމުގެ މަސައްކަތް އެމްޓީސީސީން ކުރަމުންދަނީ ވަކިވަކި ފިޔަވަހިތަކަށް ބަހާލައިގެންކަން ފާހަގަކޮށްލެވެއެވެ.
ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ފުރަތަމަ ފިޔަވަހީގެ ދަށުން ތަރައްގީކުރުމަށް ހަމަޖެހިފައިވަނީ، ލޯކަލް މާރުކޭޓުން ފެށިގެން ހެންވޭރު ފެރީ ޓާމިނަލާ ހަމައަށް ހިމެނޭ 5 ސެގްމަންޓެވެ. މިއީ ޖުމުލަ 838 މީޓަރުގެ ސަރަހައްދެކެވެ. ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމަށް އެމްޓީސީސީން ފަށާފައިވަނީ މިދިޔަ އަހަރުގެ އޮގަސްޓު މަހުގެ ތެރޭގައެވެ. ސަރުކާރުން މި މަސައްކަތް އެމްޓީސީސީއާ ހަވާލުކޮށްފައިވަނީ 144 މިލިއަން ރުފިޔާއަށެވެ.
ބޮޑުތަކުރުފާނު މަގުގެ މަސައްކަތް މިހާރު ނިމުމަކާ ގާތްވެފައިވާއިރު އަންނަ ޖޫން މަހުގެ ނިޔަލަށް މި މަސައްކަތް ނިންމައި އެ މަގު އެއްކޮށް ހުޅުވާލުމަކީ އެމްޓީސީސީގެ އަމާޒެވެ. މަގު ފުޅާކުރުމަށް ކުރަންޖެހޭ މަސައްކަތްތަކުގެ ތެރެއިން ޝީޓްޕައިލް ކުރުމުގެ މަސައްކަތުގެ ވެސް ބޮޑުބައެއް މިހާރު ވަނީ ނިމިފައެވެ.
