އެމްޑީޕީ ރޫޅަރޫޅާފައި ރޭވުމުގެ ތެރެއިން، ކުރިއަށްއޮތް އެޕާޓީގެ ޗެއާޕާސަން އިންތިޚާބާއި ދިމާކޮށް 3 ވަނަ ރޫޅުންގަނޑު މިވަނީ ފެށިފައެވެ. މިފަހަރުގެ ކޯޅުން އޮތީ އިންތިޚާބުގެ 2 ކެންޑިޑޭޓުން ކަމަށްވާ ކުރީގެ ރައީސް ނަޝީދު އާއި ގަލޮޅު ދެކުނު ދާއިރާގެ މަޖްލިސް މެންބަރު މީކާއިލްގެ މެދުގައެވެ.
އެގޮތުން އެމްޑީޕީ އާންމު މެންބަރުން އެއްވެސް މީހެއްގެ އަރިހުން މާފަށް އެދެންޖެހޭ ކަމަށް ގަބޫލު ނުކުރައްވާ ކަމަށް އެ ޕާޓީގެ ޗެއަރޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް މިވަނީ ވިދާޅުވެފައެވެ.
މީކާއިލް މި މޭރުމުން ވިދާޅުވީ، އެމްޑީޕީ ޗެއަރޕާސަން އިންތިހާބުގެ ކެމްޕޭނު ދަތުރެއްގައި ހއ. ކެލައަށް ވަޑައިގެން ބޭއްވި ޖަލްސާއެއްގައި، އެ ރަށުގެ އާންމު މެންބަރަކު ކުރި ސުވާލަކަށް ޖަވާބު ދެއްވަމުންނެވެ. މި ސުވާލު އުފެދުނީ، ރިޔާސީ އިންތިހާބާ ދިމާކޮށް އެމްޑީޕީ ދޫކުރައްވައި ވަޑައިގަތުމަކީ މައާފަށް އެދިވަޑައިގަންނަވަންޖެހޭ ކަމެއް ކަމަށް ބުނެ، ރ. ދުވާފަރުގައި އާންމު މެންބަރަކު ކުރި ސުވާލަކަށް ކުރީގެ ރައީސް މުހައްމަދު ނަޝީދު ދެއްވި ޖަވާބަކާ ގުޅިގެންނެވެ.
ދުވާފަރުގައި ވާހަކަދައްކަވަމުން ރައީސް ނަޝީދު ވަނީ އެމްޑީޕީ ދޫކުރައްވައި ވަޑައިގަތުމުން އާންމު މެންބަރުންގެ އަރިހުން މައާފަށް އެދިވަޑައިގެންފައެވެ. ނަމަވެސް، ނަޝީދު ވަނީ އެމްޑީޕީގެ އާންމު މެންބަރުން ވެސް އެމަނިކުފާނުގެ އަރިހުން މައާފަށް އެދެންޖެހޭ ކަމަށް ވިދާޅުވެފައެވެ.
މިކަމަށް ރައްދު ދެއްވަމުން މީކާއިލް ވިދާޅުވީ، ރައީސް ނަޝީދު ނޫނީ އެހެން މީހެއްގެ އަރިހުން ވެސް އެމްޑީޕީގެ އާންމު މެންބަރުން މައާފަށް އެދެންޖެހޭ ކަމަށް ގަބޫލު ނުކުރައްވާ ކަމަށެވެ.
”ވަރަށް ގިނަ އަހަރުގެ ވަރަށް ބޮޑެތި ގުރުބާނީތަކަށް ފަހު އެ ބޭފުޅުން އެ ބޭފުޅުންނަށްވީ. ރައީސް ކަމަށް ގެނައީ ވެސް އެމްޑީޕީގެ އާންމު މެންބަރުން، ރައީސް ނަޝީދު ވެސް. ރައީސް އިބްރާހިމް މުޙައްމަދު ޞާލިޙު ވެސް،“ – މީކާއިލް ވިދާޅުވިއެވެ.
މީގެ އިތުރުން މީކާއިލް ވިދާޅުވީ އެ ބޭފުޅުންނަށް ލިބިވަޑައިގެންފައިވާ މަގާމުތަކާއި، އިނާޔަތާއި ޝަރަފަކީ އާންމު މެންބަރުންގެ ގުރުބާނީގެ ނަތީޖާ ކަމަށެވެ. ނަމަވެސް، 2023 ވަނަ އަހަރުގެ ރިޔާސީ އިންތިހާބާ ދިމާކޮށް، އާންމު މެންބަރުންގެ މަސައްކަތަށް ބެލުމެއް ނެތި، ސިޔާސީ މަންފާއަށްޓަކައި އެ މެންބަރުން މަގުމަތިކޮށްލުމަށްފަހު ރައީސް ނަޝީދު ވަޑައިގަތީ ކަމަށް މީކާއިލް ވަނީ ތުހުމަތު ކުރައްވައިފައެވެ.
ކުރީގެ ނަޝީދު އެމްޑީޕީން ވަކިވެވަޑައިގެން ’ދަ ޑިމޮކްރެޓްސް‘ ގެ ނަމުގައި އާ ޕާޓީއެއް އުފެއްދެވީ ކުރީގެ ރައީސް ޞާލިހާ އުފެދުނު ސިޔާސީ ހިޔާލުތަފާތުވުންތަކެއްގެ ތެރެއިންނެވެ. ރިޔާސީ އިންތިހާބުގައި އެމްޑީޕީއަށް ލިބުނު ނާކާމިޔާބީއަށްފަހު ނަޝީދު އަލުން އެމްޑީޕީއާ ގުޅިވަޑައިގަތް ނަމަވެސް، ދެ ރައީސުންގެ މެދުގައި އަދިވެސް ސިޔާސީ ހިޔާލު ތަފާތުވުންތައް އެބަހުއްޓެވެ. އެގޮތުން ކުރިއަށް އޮތް ޗެއަރޕާސަން އިންތިހާބުގައި ރައީސް ޞާލިޙު ތާއީދު ކުރައްވަނީ ވެސް މީކާއިލަށްކަން ފާހަގަކޮށްލަންޖެހެއެވެ.
