ޕެންޝަން އޮފީހުގެ ޗެއަރޕާސަންކަމުގެ މަގާމަށް އެ އޮފީހުގެ ބޯޑް މެންބަރަށް ހުންނެވި ޢަބްދުލްމަޖީދު ޢަލީ އައްޔަންކޮށްފިއެވެ.
ޕެންޝަން އޮފީހުގެ ޗެއަރޕާސަންކަމުގެ މަގާމު ހުސްވީ، އެ މަގާމުގައި ކުރިން ހުންނެވި ކުރީގެ ފިނޭންސް މިނިސްޓަރު އަޙްމަދު އިނާޒް މިދިޔަ ފެބްރުއަރީ މަހުގެ ތެރޭގައި އިސްތިއުފާދެއްވުމުންނެވެ.
ޕްރައިވެޓް ސެކްޓަރު ތަމްސީލު ކުރާ މެންބަރެއްގެ ހައިސިއްޔަތުން މަޖީދު ޕެންޝަން އޮފީހުގެ ބޯޑަށް އައްޔަނުކޮށްފައިވަނީ 2022 ވަނަ އަހަރުގެ ފެބްރުއަރީ މަހުގެ 10 ވަނަ ދުވަހުއެވެ. މަޖީދަކީ އޮޑިޓް އަދި ފައިނޭންޝަލް ކޮންސަލްޓަންސީ ފޯރުކޮށްދޭ ރެޖިސްޓާޑް އޮޑިޓް ކުންފުންޏެއް ކަމަށްވާ އޮޕްޓިމޯ އެލްއެލްޕީގެ މެނޭޖިންގ ޑިރެކްޓަރެވެ. މީގެ ކުރިން އޭނާ ވަނީ ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ ބޯޑު މެންބަރުކަން ވެސް ކުރައްވައިފައެވެ.
ފާހަގަކޮށްލަންޖެހޭ ގޮތުގައި، ޕެންޝަން ބޯޑުގައި ޖުމުލަ އަށް މެންބަރަކު ތިއްބަވައެވެ. އެއީ ޗެއަރޕާސަންއާއި ސީއެމްޑީއޭ މެންބަރަކާއި ފިނޭންސް މިނިސްޓްރީގެ މެންބަރަކާއި ސޯޝަލް ސެކިއުރިޓީ ދާއިރާއިން ސަރުކާރު ތަމްސީލް ކުރާ އެންސްޕާގެ މެންބަރެއްގެ އިތުރުން ޕްރައިވެޓް ސެކްޓަރުގެ ހަތަރު މެންބަރުންނެވެ.
މި ވަގުތު ޕެންޝަން ބޯޑުގައި ތިއްބެވީ ޗެއަރޕާސަންގެ އިތުރުން ހަތަރު މެންބަރުންނެވެ.
