އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެންބަރުންނަށް އެއްވެސް އިނާޔަތެއް ޑަބަލްކޮށް ނުލިބޭނެ ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
މުންދު މި މޭރުމުން ވިދާޅުވީ ”ޕްރެސަ ވިތް ދަ ސްޕޮކްސް“ ގެ ނަމުގައި ޓެލެވިޒަން މޯލްޑިވްސްގައި މިއަދު ބޭއްވި ނޫސްވެރިންގެ ބައްދަލުވުމުގައި ”އެކި އެމްވީ“ ގެ ނޫސްވެރިޔާ ކުރި ސުވާލަށް ޖަވާބުދެއްވަމުންނެވެ. އެ ނޫސްވެރިޔާ މުންދުއާ ކުރި ސުވާލަކީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ރައީސުންނަކީ ފުލްޓައިމްކޮށް މަސައްކަތް ކުރާ ފަރާތްތަކެއް ނަމަވެސް އެ ކޮމިޓީތަކުގައި މަސައްކަތް ކުރާ ބައެއް މެންބަރުންނަކީ އިތުރު އެހެން ވަޒީފާތައް ވެސް އަދާކުރާ ބައެއްކަން ފާހަގަކުރެވޭ ކަމަށެވެ. އެގޮތުން އެ ފަދަ ފަރާތްތަކަށް އެ މަސައްކަތް ކުރާ ތަނަކުން ރަމަޟާން މަހުގެ އިނާޔަތް ލިބުން ގާތްއިރު، އަންހެނުންގެ ކޮމިޓީގައި މަސައްކަތް ކުރާތީ ލިބޭ ރަމަޟާން މަހުގެ އިނާޔަތް އެފަދަ މެންބަރުންނަށް ލިބޭނެތޯއެވެ.
އެ ސުވާލަށް ޖަވާބުދެއްވަމުން މުންދު ވިދާޅުވީ، ރަމަޟާން މަހުގެ އިނާޔަތަކީ ރާއްޖޭގައި ވަޒީފާއަދާކުރާ ހުރިހާ ފަރާތްތަކަށް ލިބެންޖެހޭ އެއްޗެއް ކަމަށާއި ނަމަވެސް، އެއްވެސް އިނާޔަތެއް ޑަބަލްކޮށް އެއްވެސް ފަރާތަކަށް ނުލިބޭނެ ކަމަށެވެ. އެކަން އެގޮތަށްވާނަމަ ހެދިފައިވާ ގަވާއިދުތަކަށް ވެސް ފުށޫއަރާ ކަމަށް މުންދު ވިދާޅުވިއެވެ.
”ރަމަޟާން މަހުގެ އިނާޔަތަކީ އަޅުގަނޑު ދެކޭ ގޮތުގައި ހަމަ ރާއްޖޭގައި ވަޒީފާއަދާކުރާ ހުރިހާ އަހުންނާއި އުހްތުންނަށް ލިބިވަޑައިގަންނަވަންވާނެ އެއްޗެއް. ޑަބަލްކޮށް އެއްވެސް ފަރާތަކަށް އިނާޔަތެއް ނުލިބޭނެ، އަޅުގަނޑަށް ހީވަނީ އެއީ މުޅިން އެހެން ގަވާއިދެއްގެ ތެރޭގައި އޮންނަ ކަމެއްހެން. ސަރުކާރުން އެއްވެސް މީހަކަށް ޑަބަލްކޮށް އެއް އިނާޔަތެއް ނުދޭނެ. އޭރުން އެބަ ފުށޫއަރާ ހެދިފައިވާ ގަވާއިދުތަކަށް،“ – މުންދު ވިދާޅުވިއެވެ.
ފާހަގަކޮށްލެވޭ ގޮތުގައި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ރައީސުންގެ މުސާރައަށް އަލަށް ގެނެވުނު ބަދަލުތަކާ ގުޅިގެން ގިނަ ބައެއްގެ ފާޑުކިޔުން އަމާޒުވުމާ ގުޅިގެން ފިނޭންސް މިނިސްޓްރީން ވަނީ މުސާރައިގެ އޮނިގަނޑަށް ބޮޑު ބަދަލެއް ގެނެސްފައެވެ. އެގޮތުން މީގެ ކުރިން އަންހެނުންގެ ކޮމިޓީތަކުގެ ސިޓީތަކުގެ ރައީސުންނަށް މުސާރައިގެ ގޮތުގައި 41،000 ރުފިޔާ އަދި އަތޮޅުތެރޭގެ ރަށްރަށުގެ ރައީސުންނަށް 21،000 ރުފިޔާ ކަނޑައެޅިއެވެ.
ނަމަވެސް މިހާރު ސިޓީތަކުގެ އަންހެނުންގެ ކޮމިޓީތަކުގެ ރައީސުންގެ މުސާރައަކީ 20،000 ރުފިޔާ އަދި އަތޮޅުތެރޭގެ ރަށްރަށުގެ ރައީސުންގެ މުސާރައަކީ 15،000 ރުފިޔާއެވެ.
