އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ ޖާސޫސީ އިދާރާތަކުގެ އެންމެ އިސްވެރިޔާ، ޑިރެކްޓަރ އޮފް ނެޝަނަލް އިންޓެލިޖެންސްގެ މަޤާމުގައި ހުންނެވި ޓަލްސީ ގެބަރޑް އެ މަޤާމުން އިސްތިއުފާ ދެއްވައި، އިސްތިއުފާގެ ސިޓީ ހުށަހަޅުއްވައިފިއެވެ.
މީސްމީޑިޔާގައި އާންމުކުރައްވާފައިވާ އިސްތިއުފާގެ ސިޓީގައި ގެބަރޑް ވިދާޅުވީ، ފާއިތުވި 18 މަސް ދުވަހުގެ ތެރޭގައި އެމެރިކާގެ ނެޝަނަލް އިންޓެލިޖެންސް އިދާރާގެ ޑިރެކްޓަރުގެ މަޤާމުގައި ޤައުމަށް ޚިދުމަތް ކުރުމުގެ ފުރުޞަތު ރައީސް ޓްރަމްޕް ދެއްވިކަމަށްޓަކައި ޝުކުރު އަދާކުރައްވާ ކަމަށެވެ. މަޤާމުން އިސްތިއުފާ ދެއްވަން ނިންމެވި މައިގަނޑު ސަބަބެއްގެ ގޮތުގައި އޭނާ ފާހަގަކުރެއްވީ، އޭނާގެ ފިރިކަލުން ކެންސަރު ބައްޔަށް ފަރުވާ ހޯއްދަވަން ޖެހިވަޑައިގަތުމާ ގުޅިގެން، އާއިލާއަށް ވަގުތު ދެއްވުމެވެ.
ރައީސް ޑޮނަލްޑް ޓްރަމްޕް ވަނީ ގެބަރޑްގެ އިސްތިއުފާ ޤަބޫލުކުރައްވައި، އޭނާ ކޮށްދެއްވި ފުރިހަމަ ޚިދުމަތަށް ތައުރީފު ކުރައްވައި ޝުކުރު ދަންނަވައިފައެވެ. އަދި އެ މަޤާމަށް އާ ބޭފުޅަކު ޢައްޔަނުކުރެވެންދެން، އެ އިދާރާގެ ދެވަނައަށް އެންމެ އިސްވެރިޔާ އެރޮން ލޫކާސް މަސްޢޫލިއްޔަތުތަކާ ހަވާލުވެވަޑައިގަންނަވާނެ ކަމަށް ޓްރަމްޕް ވިދާޅުވިއެވެ.
ޓަލްސީ ގެބަރޑަކީ މީގެ ކުރިން އެމެރިކާގެ ޤާނޫނުހަދާ މަޖިލިސް (ކޮންގްރެސް) ގައި 8 އަހަރު ދުވަހު އިދިކޮޅު ޑިމޮކްރެޓިކް ޕާޓީގެ މެންބަރެއްގެ ގޮތުގައި ޚިދުމަތް ކުރެއްވި ބޭފުޅެކެވެ. ނަމަވެސް 2020 ވަނަ އަހަރު އެ ޕާޓީން ވަކިވެވަޑައިގެން، އޭނާ ވަނީ ރައީސް ޓްރަމްޕަށް ތާއީދުކުރައްވަން ފަށްޓަވައިފައެވެ. ގެބަރޑް ވިދާޅުވެފައިވާ ގޮތުގައި ޓްރަމްޕަށް ތާއީދުކުރެއްވި އެންމެ ބޮޑު ސަބަބަކީ، ބޭރުގެ ޤައުމުތަކުގައި ކުރާ ބޭކާރު ހަނގުރާމަތަކުގައި އެމެރިކާ ސިފައިން ބައިވެރިކުރުން ހުއްޓުވާނެ ކަމަށް ޓްރަމްޕް ވެވަޑައިގެންނެވި ވަޢުދެވެ.
އިސްތިއުފާގެ ރަސްމީ ސަބަބަކީ އާއިލީ ކަމެއް ކަމަށް ވިޔަސް، ބައެއް ރިޕޯޓުތައް ބުނާގޮތުގައި ގެބަރޑް ހުންނެވީ ސަރުކާރުގެ ބައެއް ސިޔާސަތުތަކާ މެދު ނުހަނު ބޮޑަށް ހިތްހަމަނުޖެހިފައެވެ. ވަކިން ޚާއްޞަކޮށް، ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރުމަށް އެމެރިކާ ސިފައިން އެ ޤައުމަށް އެރުމާއި، ޔަހޫދީންނާ ގުޅިގެން އީރާނާ ދެކޮޅަށް އެމެރިކާއިން ކުރަމުންދާ ޣައިރުޤާނޫނީ ހަނގުރާމަތަކުގެ ސަބަބުން އޭނާގެ ހިތްހަމަނުޖެހުން އިންތިހާއަށް ބޮޑުވެފައިވާ ކަމަށް މަސްދަރުތަކުން ބުނެއެވެ.
