މިދުވަސްވަރު ރާއްޖޭގައި ހިމަބިހި (މީސަލްސް) ގެ ކޭސްތައް އިތުރުވަމުންދާތީ، އެ ބަލީގެ އަލާމާތްތައް ހުންނަ ފަރާތްތަކަށް އަވަސް އެހީތެރިކަން ފޯރުކޮށްދިނުމަށްޓަކައި އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) އިން ޚާއްސަ ހެލްޕް ޑެސްކެއް ގާއިމުކޮށްފިއެވެ.
އައިޖީއެމްއެޗުން މައުލޫމާތު ދޭ ގޮތުގައި މި ހެލްޕް ޑެސްކު ގާއިމުކޮށްފައިވަނީ އެ ހޮސްޕިޓަލުގެ ބޮޑެތި މީހުންގެ ކުއްލި ފަރުވާދޭ ބައި (އީއާރު) ގެ އެމްބިއުލަންސް ޕޯޓިކޯ ކައިރީގައެވެ. މި ހެލްޕް ޑެސްކުގެ ޚިދުމަތް ކޮންމެ ދުވަހެއްގެ ހެނދުނު 08:00 އިން ރޭގަނޑު 23:00 އާ ހަމައަށް އާންމުންނަށް ލިބިވަޑައިގަންނަވާނެއެވެ.
ހޮސްޕިޓަލުން އިލްތިމާސްކުރާ ގޮތުގައި، ހުމާއެކު ހަށިގަނޑުގައި ރަތްކުލައިގެ ބިހި ނެގުން ފަދަ ހިމަބިހީގެ އެއްވެސް އަލާމާތެއް ކުޑަކުދިން، ބޮޑެތި މީހުން ނުވަތަ މާބަނޑު މީހެއްގެ ކިބައިން ފެނިއްޖެނަމަ، ލަސްނުކޮށް ޑޮކްޓަރަށް ދެއްކުމަށް ނުވަތަ މި ހެލްޕް ޑެސްކަށް ރިޕޯޓްކުރުން މުހިންމެވެ. ހެލްޕް ޑެސްކަށް ރިޕޯޓްކުރުމުން، އެތަނުގެ މުވައްޒަފުން ބަލިމީހާއަށް ދެން އަމަލުކުރަންވީ ގޮތުގެ ފަންނީ އިރުޝާދު ދޭނެއެވެ.
ރޭގަނޑު 23:00 ގެ ފަހުން ހުމާއެކު ރަތްކުލައިގެ ބިހީގެ އަލާމާތްތައް ހުރެގެން ކުއްލި ފަރުވާ ބޭނުންވާ ހާލަތްތަކުގައި އަމަލުކުރަންވީ ގޮތްވެސް އައިޖީއެމްއެޗުން ވަނީ ހާމަކޮށްފައެވެ. އެގޮތުން ބޮޑެތި މީހުންނާއި މާބަނޑު އަންހެނުން މެއިން އެމަޖެންސީ ރޫމްގެ ޓްރިއަޖް ނަރުހަށް އެކަން އެންގުމަށާއި، ކުޑަކުދިން ނަމަ ކުޑަކުދިންގެ އެމަޖެންސީ ރޫމްގެ ޓްރިއަޖް ނަރުހަށް އެކަން އެންގުމަށް ވަނީ އެދިފައެވެ.
ބަލި ފެތުރުން ކޮންޓްރޯލް ކުރުމުގެ ގޮތުން، ހުން އައިސް ރަތްކުލައިގެ ބިހި ނަގާފައިވާ ބަލިމީހުން ހޮސްޕިޓަލަށް ވަޑައިގަންނަވާއިރު މާސްކް އެޅުއްވުމަށް ހާއްސަ ސަމާލުކަމެއް ދެއްވުމަށް ހޮސްޕިޓަލުން އެދެއެވެ. އަދި ބަލިމީހާއާއެކު އެހީތެރިންގެ ގޮތުގައި ވީހާވެސް މަދު ބަޔަކު ވަޑައިގަތުމަށްވެސް ވަނީ އިލްތިމާސްކޮށްފައެވެ.
މީގެ އިތުރުން، ކުޑަކުދިން ޑޮކްޓަރަށް ދައްކަން ވަޑައިގަންނަވާއިރު އެ ކުއްޖެއްގެ ވެކްސިން ކާޑު ގެނައުމަކީ ފަރުވާ ދިނުމުގައި ފަސޭހަވެގެންދާނެ ކަމެއް ކަމަށް ހޮސްޕިޓަލުން ފާހަގަކުރެއެވެ. މިކަމާ ގުޅޭ އިތުރު މައުލޫމާތު ހޯއްދެވުމަށް އައިޖީއެމްއެޗްގެ ނަންބަރު 3335335 އަށް ގުޅުއްވުމަށް އެ ހޮސްޕިޓަލުން އިރުޝާދުދެއެވެ.
