މި އަހަރު ދިވެހި ޙައްޖާޖީންގެ އެންމެ އިސްވެރިއެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައަޅުއްވާފައިވާ ބޭފުޅާ، އިކޮނޮމިކް މިނިސްޓަރު މުޙައްމަދު ސަޢީދު ދިވެހި ޙައްޖާޖީންނާ ބައްދަލުކުރައްވައިފިއެވެ.
ޙައްޖާޖީންނާ ބައްދަލުކުރައްވައި މިނިސްޓަރު ސަޢީދު ވަނީ ޙައްޖުގެ ކަންކަން ކުރިއަށްދާ ގޮތް އޮޅުންފިލުއްވައިފައެވެ. މީގެ އިތުރުން ވަކިވަކިން ވެސް ޙައްޖާޖީންނާ ބައްދަލުކުރައްވައި އެ ފަރާތްތަކުގެ އެއްވެސް ކަހަލަ ކަންބޮޑުވުމެއް ނުވަތަ ދައްޗެއް އޮތްްތޯ ވެސް މިނިސްޓަރު އޮޅުންފިލުއްވާފައިވެއެވެ.
މިއަހަރު ދިވެހިރާއްޖެއިން ޙައްޖުވެރިންގެ އިސް ވެރިއެއްގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވާ، އިޤްތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު ދިވެހި ޙައްޖުވެރިންނާ ބައްދަލުކުރެއްވުން pic.twitter.com/o3WOFdHFcm
— Maldives hajj mission بعثة ا لحج ا المالديفية (@hajjmission_mv) May 22, 2026
ފާހަގަކޮށްލަންޖެހޭ ގޮތުގައި، އެހެން އަހަރުތަކެކޭ ވެސް އެއްފަދައިން މި އަހަރު ވެސް، ދިވެހިރާއްޖެއިން 1،000 މީހުން ޙައްޖުގެ މަތިވެރި އަޅުކަމަށް ވަނީ ގޮސްފައެވެ. އެގޮތުން ޖުމުލަ ހަތަރު ފްލައިޓުގައި ދިވެހި ޙައްޖާޖީން ސަޢުދީ ޢަރަބިއްޔާއަށް ގޮސްފައިވެއެވެ. އެއީ މޯލްޑިވިއަންގެ ދެ ފްލައިޓުގައްޔާއި ސަޢުދިއާގެ ދެ ފްލައިޓުގައެވެ.
މިއަހަރުގެ ޙައްޖުގެ ކަންކަން ވެސް އަމާންކަމާއެކު ކުރިއަށްގެންދިޔުމަށްޓަކައި މޯލްޑިވްސް ޙައްޖު މިޝަނާއި، ޙައްޖު ކޯޕަރޭޝަނުން ދަނީ މެދުކެނޑުމެއްނެތި މަސައްކަތް ކުރަމުންނެވެ. އެގޮތުން ޙައްޖުވެރިންގެ ހުރުމާއި، ކާބޯތަކެއްޗާއި، އަދި އެހެނިހެން ޒަރޫރީ ބޭނުންތައް އެންމެ ފުރިހަމަ ގޮތުގައި އިންތިޒާމުކުރުމަށް އެ ފަރާތްތަކުން ހާއްސަ އިސްކަމެއްދީގެން އަންނަނީ މަސައްކަތް ކުރަމުންނެވެ.
