ދައުލަތަށް ހިދުމަތްކުރެއްވުމުގެ އިނާމު ހާސިލުކުރައްވައިފައިވާ އަލީ ޒުބައިރު 61އ އަވަހާރަ ވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
މާލެ ސިޓީ ކައުންސިލްގެ އެސިސްޓެންޓް ކައުންސިލް އެގްޒެކެޓިވް ކަމުގެ މަގާމުގައި ހުންނެވި، އަލީ ޒުބައިރު އަވަހާރަވުމާއި ގުޅިގެން ތައުޒިޔާ ވިދާޅުވެ ރައީސް މުއިއްޒު ކުރެއްވި ޕޯސްޓުގައި ވިދާޅުވީ އަލީ ޒުބައިރުގެ ހިދުމަތުގެ 43 އަހަރާއި 11 މަހަށްވުރެ ދިގުމުއްދަތުގައި، މާލޭގެ މުނިސިޕަލް މަސައްކަތްތަކުގައި ގިނަ އަހަރުތަކެއް ހޭދަކުރެއްވިކަމަށެވެ.
އެކުގައި މަސައްކަތްކުރެއްވިއިރު، އަލީ ޒުބައިރުގެ ފަރާތްޕުޅުން ކޮންމެ ދުވަހަކުވެސް ފެނިވަޑައިގެންނެވީ މުރާލިކަމާއި އިހުލާސްތެރިކަމާއި ކަމޭހިތުމާއެކު ކަންކަން ކުރެއްވުމުގެ ރީތި ނަމޫނާކަމަށާއި ގާތް އަހެއްގެ ގޮތުގައި އަބަދުވެސް ހެޔޮއެދިވަޑައިގެން ދެއްވި މަޝްވަރާތަކާއި އެއްބާރުލެއްވުމުގެ ހަނދާން ދުވަހަކުވެސް ނުނެތޭނެކަމަށް އެ މަނިކުފާނު ވިދާޅުވިއެވެ.
”އެންމެންނާ ރަހުމަތްތެރި، އޯގާތެރި މިތުރަކު އަޅުގަނޑުމެންނާ ވަކިވެ ދިއުމުގެ ހިތާމަ އިހްސާސްކުރާ މި ދަނޑިވަޅުގައި، މަރްޙޫމްގެ ލޮބުވެތި އާއިލާއަށާއި މާލެ ސިޓީގެ ރައްޔިތުންނަށާއި މާލޭ ސިޓީ ކައުންސިލްގެ މުވައްޒަފުންނަށް ތައުޒިޔާ ދަންނަވަން. މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ތަނަވަސް ރަޙްމަތުގައި މަރްހޫމް އަލީ ޒުބައިރު ލަހައްޓަވާށި. ދަރުމައާއި ސަވާބު އިތުރުކޮށްދެއްވާށި. އާމީން“ ރައީސްގެ ޕޯސްޓުގައިވެއެވެ.
މަހްރޫމް އަލީ ޒުބައިރުގެ ޖަނާޒާ ވަނީ މިއަދު ހުކުރު ނަމާދަށް ފަހުގައި އާސަހަރާގައި ބާއްވައިފައެވެ.
