މާލެ ސިޓީ ކައުންސިލަށް ގިނަ އަހަރުތަކެއް ވަންދެން ހިދުމަތް ކުރެއްވި އަދި ދައުލަތަށް ހިދުމަތްކުރެއްވުމުގެ އިނާމު ހާސިލުކުރައްވައިފައިވާ އަލީ ޒުބައިރު 61އ އަވަހާރަވެއްޖެއެވެ.
މާލެ ސިޓީ ކައުންސިލްގެ އެސިސްޓެންޓް ކައުންސިލް އެގްޒެކެޓިވް ކަމުގެ މަގާމުގައި ހުންނެވި، އަލީ ޒުބައިރު ވަމީ 43 އަހަރާއި 11 މަހަށްވުރެ ދިގުމުއްދަތުގައި، މާލޭގެ މުނިސިޕަލް މަސައްކަތްތަކުގައި ހޭދަކުރައްވާފައެވެ.
އަލީ ޒުބައިރުގެ ޖަނާޒާ ވަނީ މިއަދު ހުކުރު ނަމާދަށް ފަހުގައި އާސަހަރާގައި ބާއްވައިފައެވެ.
އަލީ ޒުބައިރު ދައުލަތަށް ހިދުމަތް ކުރުމުގެ ދިގު ދަތުރު ފެށުނީ 1982 ވަނަ އަހަރުގެ ސެޕްޓެންބަރު މަހުގެ 1 ވަނަ ދުވަހު މާލެ މުނިސިޕަލްޓީންނެވެ. އެގޮތުން 1984 އާ ހަމައަށް އެ އިދާރާގައި މަސައްކަތް ކުރެއްވުމަށްފަހު، 1984 އިން 1990 އަށް މުނިސިޕަލްޓީގެ ސެކްރެޓަރީއެއްގެ މަގާމު ފުރުއްވިއެވެ. އޭގެ ފަހުން 1990 އިން 1994 އަށް ސީނިއާ ސެކްރެޓަރީ ޖެނެރަލްގެ މަގާމުގައި ހުންނެވުމަށްފަހު، 1994 އިން 1996 އަށް އެޑްމިނިސްޓްރޭޓިވް އޮފިސަރެއްގެ ގޮތުގައި މަސައްކަތް ކުރެއްވިއެވެ.
މީގެ އިތުރުން ދައުލަތުގެ އޮނިގަނޑަށް އަންނަމުންދިޔަ ބަދަލުތަކާއެކު، 1996 އިން 1999 އަށް މޯލްޑިވްސް ހައުސިން އެންޑް އރބަން ޑިވެލޮޕްމަންޓް ބޯޑުގެ އެޑްމިނިސްޓްރޭޓިވް އޮފިސަރެއްގެ ގޮތުގައި މަސައްކަތް ކުރެއްވުމަށްފަހު، 1999 އިން 2002 އަށް ސީނިއަރ އެޑްމިނިސްޓްރޭޓިވް އޮފިސަރުގެ މަގާމު އަދާކުރެއްވިއެވެ. އަދި 2002 އިން 2006 އަށް އެ ތަނުގެ އެސިސްޓަންޓް ޑިރެކްޓަރުގެ މަގާމު ފުރުއްވިއެވެ.
އަލީ ޒުބައިރު އަވަހާރަވުމުން ރައީސް ޑރ. މުހައްމަދު މުއިއްޒު ވަނީ ތައުޒިޔާ ވިދާޅުވެފައެވެ.
