މި ސަރުކާރު ހަވާލުވެ މިދިޔަ ދެ އަހަރާއި ބައިގެ މުއްދަތުގެ ތެރޭގައި، ރާއްޖޭގައި ދިރިއުޅޭ 99 އިންސައްތަ ބިދޭސީންގެ މައުލޫމާތު އެއްކޮށް، ގަވާއިދާ ހިލާފަށް އުޅެމުންދިޔަ 12،000 އަށްވުރެ ގިނަ ބިދޭސީން ޑީޕޯޓުކުރެވިއްޖެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ ދައުލަތުގެ މީޑިއާއިން ”ނޭޝަން ޗެޓް“ ގެ ނަމުގައި ގެނެސްދޭ ޕްރޮގްރާމްގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި ވޭތުވެދިޔަ އެއްވެސް ސަރުކާރަކުން އެކަށީގެންވާ މަސައްކަތެއް ކޮށްފައިނުވާ ކަމަށެވެ.
މިކަމުގައި ކުރީގެ ސަރުކާރުތަކުން ކޮށްފައިވާ މަސައްކަތްތަކުގެ ތަފާސްހިސާބުތަކަށް އަލިއަޅުއްވާލައްވަމުން ރައީސް މުޢިއްޒު ވިދާޅުވީ، ގަވާއިދާ ހިލާފަށް އުޅޭ ބިދޭސީންގެ ތެރެއިން 12،193 މީހަކު މި ސަރުކާރުން މިހާތަނަށް ޑީޕޯޓުކޮށްފައިވާ ކަމަށާއި، ނަމަވެސް ނިމިދިޔަ އެމްޑީޕީ ސަރުކާރުގައި ޑީޕޯޓުކޮށްފައިވަނީ އެންމެ 2،600 ބިދޭސީން ކަމަށެވެ. އަދި އޭގެ ކުރީގެ ސަރުކާރުން އެއްވެސް ބިދޭސީއަކު ޑީޕޯޓުކޮށްފައިނުވާކަން އެމަނިކުފާނު ވަނީ ފާހަގަކުރައްވައިފައެވެ.
ހަމައެހެންމެ މި ސަރުކާރުގެ ދެ އަހަރާއި ބައިގެ ތެރޭގައި 206،400 ބިދޭސީންގެ މައުލޫމާތު އެއްކުރެވިފައިވާ ކަމަށާއި، ނަމަވެސް ނިމިދިޔަ އެމްޑީޕީ ސަރުކާރުގައި ނެގުނީ އެންމެ 27،000 ބިދޭސީންގެ ބަޔޯމެޓްރިކްސް ކަމަށް އެމަނިކުފާނު ވިދާޅުވިއެވެ. އަދި ކުރީގެ ސަރުކާރުން ބިދޭސީންގެ އެއްވެސް މައުލޫމާތެއް އެއްކޮށްފައިނުވާކަން އެމަނިކުފާނު ވަނީ ފާހަގަކުރައްވައިފައެވެ.
”މި ސަރުކާރުގެ ދެ އަހަރާއި ބައިގެ ތެރޭގައި އިތުރު 206،400 މީހުންގެ ބައޯމެޓްރިކްސް ނަގައިފިން، މިހާރު ބާކީ ތިބީ އެއް ޕަސެންޓު ބިދޭސީންގެ ނުނަގައި،“ ރައީސް މުޢިއްޒު ވިދާޅުވިއެވެ.
ފާހަގަކޮށްލެވޭ ގޮތުގައި، އަތޮޅުތެރޭގެ ރަށްރަށުގައި 2،800 އަށްވުރެ ގިނަ ބިދޭސީން އަދިވެސް މައުލޫމާތު ނުނެގި އެބަތިއްބެވެ. އެ ބިދޭސީން ހޯދައި ކުރިއަށް އޮތް ހަ މަސްދުވަހުގެ ތެރޭގައި ޑީޕޯޓު ކޮށްލުމަށް ސަރުކާރުން މިހާރު ވަނީ ނިންމައިފައެވެ.
