ކުރީ ސަރުކާރުތަކާ ހިލާފަށް މި ސަރުކާރުގައި ސިޔާސީ އެއްވެސް ލީޑަރަކު ހައްޔަރުކޮށްފައި ނުވާނެ ކަމަށާއި، ސިޔާސީ ޕާޓީތައް ވެސް ކުރިއަށްވުރެ ބޮޑަށް މިނިވަންކަމާއެކު ހަރަކާތްތެރިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ ދައުލަތުގެ މީޑިއާއިން ގެނެސްދޭ ”ނޭޝަން ޗެޓް“ ޕްރޮގްރާމްގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ، ސިޔާސީ ލީޑަރުން ޖަލަށްލުމަކީ މީގެ ކުރީގެ ސަރުކާރުތަކުން އާންމުކަމަކަށް ހަދާފައިވާ ކަމެއް ކަމަށާއި، ނަމަވެސް މި ސަރުކާރުން ދުވަހަކު ވެސް އެކަން އެގޮތަށް ނުކުރައްވާނެ ކަމަށެވެ.
އެންމެ ބޮޑަށް ބޭނުންފުޅުވަނީ ބަދަލުހިފުމުގެ ރޫހު ނައްތާލައްވައި، ގައުމުގައި ސިޔާސީ ހަމަޖެހުން ގާއިމުކުރެއްވުމަށްކަން ފާހަގަކުރައްވައި ރައީސް މުޢިއްޒު ވިދާޅުވީ، އެމަނިކުފާނު ވެވަޑައިގެންފައިވާ ވައުދާ އެއްގޮތަށް މިއަދު، ކޮންމެ މީހަކަށް ވެސް ސިޔާސީ މަސައްކަތް ކުރުމުގެ ފުރުސަތު ފަހިވެފައިވާ ކަމަށެވެ. މީގެކުރިން ސިޔާސީ މަސައްކަތް ކުރުމުގައި ބިރުވެރިކަން އޮތް ނަމަވެސް، މިހާރު އެފަދަ އެއްވެސް ބިރުވެރިކަމެއް ނެތް ކަމަށް އެމަނިކުފާނު ވިދާޅުވިއެވެ.
މީގެ އިތުރުން ސިޔާސީ ޕާޓީތަކުން ކުރާ އެއްވެސް މަސައްކަތަކަށް ހުރަސް ނާޅުއްވާނެ ކަމަށް ރައީސް ވަނީ ވިދާޅުވެފައެވެ. ނަމަވެސް، ރާއްޖެއަކީ ސައްތައިން ސައްތަ އިސްލާމީ ގައުމެއްކަން ހަނދާނުގައި ބަހައްޓަންޖެހޭ ކަމަށާއި، އެފަދަ ހަރަކާތްތައް ހިންގަންވާނީ ދީނުގެ ކަނޑައަޅުއްވާފައިވާ ހަމަތަކުގެ މަތިން ކަމަށް އެމަނިކުފާނު ވިދާޅުވިއެވެ. ހަމައެހެންމެ ހިޔާލު ފާޅުކުރުމުގެ މިނިވަން ކަމަށް ވެސް އެއްވެސް ކަހަލަ ހުރަހެއް ނެތް ކަމަށާއި ނަމަވެސް، ހިޔާލު ފާޅުކުރުމުގެ ނަމުގައި މީހުންގެ އަބުރު ކަތިލުމާއި، މީހުންގެ ހައްގުތަކަށް އަރައިގަތުން ފަދަ ދީނުގައި ނަހީކުރައްވާފައިވާ އަމަލުތައް ނުހިންގުމަށް އެމަނިކުފާނު ވަނީ ނަސޭހަތްތެރިވެވަޑައިގެންފައެވެ.
ރައީސް އިތުރަށް ވިދާޅުވީ، ޒިންމާދާރު އިދިކޮޅު ޕާޓީއެއްގެ ދައުރަކީ ހަމައެކަނި ސަރުކާރު ޖަވާބުދާރީ ކުރުވުން ނޫން ކަމަށެވެ. ގައުމާއި ރައްޔިތުންނަށް ފައިދާވާ ގޮތަށް ސަރުކާރުން ކޮށްދޭ ކޮންމެ ކަމެއްގައި އިދިކޮޅު ޕާޓީތަކުން ވެސް ސަރުކާރަށް އެއްބާރުލުންދޭންޖެހޭ ކަމަށާއި ނަމަވެސް، ޒިންމާދާރު އިދިކޮޅު ޕާޓީއެއްގެ މަންޒަރު އެއްވެސް ގޮތަކަށް ނުފެންނަ ކަމަށް އެމަނިކުފާނު ވަނީ ވިދާޅުވެފައެވެ.
