2026 ޖޫން 13 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ދ. މީދޫ ކައުންސިލްގެ ރައީސް ހޮވުމުގެ އިތުރުބުރުގެ ވޯޓުލުމާއި ވޯޓުގުނުމުގެ ކަންތައްތައް ހިނގާ ނުހިނގާގޮތް ބެލުމަށް، ކެންޑިޑޭޓުންގެ މަންދޫބުން، އޮބްޒާވަރުން އަދި މޮނިޓަރުންނަށްވުމުގެ ފުރުޞަތު އިލެކްޝަންސް ކޮމިޝަނުން ހުޅުވާލައިފިއެވެ.
މި އިންތިޚާބުގައި ހަރަކާތްތެރިވާން ޝައުޤުވެރިވާ ފަރާތްތަކުން 2026 މޭ 25 ވާ ހޯމަ ދުވަހުގެ މެންދުރުފަހު 13:00 ގެ ނިޔަލަށް އެ ފަރާތަކަށް ހަމަޖެހިފައިވާ ޕޯޓަލް މެދުވެރިކޮށް ފޯމު ހުށަހަޅަންޖެހޭނެއެވެ.
އިލެކްޝަންސް ކޮމިޝަނުން މަޢުލޫމާތު ދޭ ގޮތުގައި، މި އިތުރުބުރުގައި ވާދަކުރާ ކޮންމެ ކެންޑިޑޭޓަކަށްވެސް އެ ކެންޑިޑޭޓެއްގެ މަސްލަހަތު ހިމެނޭ ކޮންމެ މަރުކަޒަކަށް އެއް މަންދޫބަކު އައްޔަންކުރުމުގެ ފުރުޞަތު ލިބިގެންވެއެވެ. މި އިންތިޚާބުގައި ޖުމްލަ 3 ވޯޓު ފޮށި ބެހެއްޓުމަށް ހަމަޖެހިފައިވާއިރު، ކޮންމެ ކެންޑިޑޭޓެއްގެ ފަރާތުން ކޮންމެ ފޮށްޓަކަށް މަންދޫބަކު އައްޔަންކުރެވޭނެއެވެ.
އޮބްޒާވަރުންނާއި މޮނިޓަރުންނަށް ފާސް ދޫކުރުމުގައި ކަނޑައަޅާފައިވާ އުސޫލުތަކަށް ބަލާއިރު، ސިޔާސީ ޕާޓީތަކާއި ޖަމިއްޔާތަކަށް އޮބްޒާވަރުންގެ ފާސް ދޫކުރާނީ ވޯޓު ފޮށީގެ އަދަދަށްވުރެ 10 އިންސައްތަ އިތުރުނުވާ ގޮތަށެވެ. އަދި ރަޖިސްޓަރީކޮށްފައިވާ ނޫސް މަޖައްލާތަކަށާއި ޚަބަރު ފަތުރާ އިދާރާތަކަށް މޮނިޓަރުކުރުމަށް ފާސް ދޫކުރެވޭނީ، ކޮންމެ ސަރަޙައްދަކަށް އެކަކަށްވުރެ އިތުރުނުވާ ގޮތަށެވެ. ވޯޓުލާ މަރުކަޒުގައި ކޮންމެ ޙައިސިއްޔަތަކުންވެސް އެއްފަހަރާ ހަރަކާތްތެރިވެވޭނީ އެއް އޮބްޒާވަރަކަށާއި އެއް މޮނިޓަރަކަށެވެ.
ފޯމު ހުށަހެޅުމުގެ އިންތިޒާމުތައް ހަމަޖެހިފައިވަނީ އަންނަނިވި ގޮތަށެވެ:
ކެންޑިޑޭޓުންގެ މަންދޫބުން: ކޮމިޝަނުގެ މައި ޕޯޓަލް my.elections.gov.mv މެދުވެރިކޮށް ކެންޑިޑޭޓުން ހުށަހެޅުން.
އޮބްޒާވަރުންނާއި މޮނިޓަރުން (ޖަމިއްޔާ/މީޑިއާ): ކަނޑައަޅާފައިވާ ޑޭޓާ ލިއޭޒަނެއް މެދުވެރިކޮށް މައި ޕޯޓަލްއިން ހުށަހެޅުން.
ސިޔާސީ ޕާޓީތަކުގެ އޮބްޒާވަރުން: ސިމެދަ ޕޯޓަލް simedha.elections.gov.mv މެދުވެރިކޮށް ހުށަހެޅުން.
މި އިންތިޚާބުގެ ވޯޓުލުން ކުރިއަށްދާނީ 2026 ޖޫން 13 ވާ ހޮނިހިރު ދުވަހުގެ ހެނދުނު 08:00 އިން ހަވީރު 04:00 އަށެވެ. ވޯޓުލުމަށްޓަކައި ދ. މީދޫގައި ހުންނަ ދ. އަތޮޅު މަދަރުސާގައި 2 ވޯޓު ފޮށި އަދި މާލޭގައި ހުންނަ ދަރުމަވަންތަ ސްކޫލްގައި 1 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.
މި އިންތިޚާބަކީ ލޯކަލް ކައުންސިލްތަކުގެ އިންތިޚާބު 2026 ގެ ދަށުން ބޭއްވޭ އިންތިޚާބެކެވެ. އިލެކްޝަންސް ކޮމިޝަނުން މަސައްކަތް ކުރަމުންދަނީ އިންތިޚާބުގެ ކަންކަން ދެފުށް ފެންނަ، އިންސާފުވެރި ނިޒާމެއްގެ ތެރެއިން ކުރިއަށް ގެންދިއުމަށެވެ.
