ގ. ހިޔާ ރޯދި ގޭގައި ރޯކޮށްލި މައްސަލައިގެ ތުހުމަތުގައި ހައްޔަރުކޮށްފައިވާ ޙުސައިން ޝަހުބާން، އަވަސް ފަރުވާއަށް ހޮސްޕިޓަލަށް ގެންދިއުމުން ފިލައިގެން އުޅެނިކޮށް އޭނާ ހޯދާ ހައްޔަރުކޮށްފިއެވެ.
އޭނާ ފިލާފައިވަނީ އަވަސް ފަރުވާ ދިނުމަށް ހުޅުމާލެ ހޮސްޕިޓަލަށް ގެންދިޔަތަނުން ކަމަށް ކަރެކްޝަނުން ވަނީ މައުލޫމާތު ދީފައެވެ. ޝަހުބާން ފިލުމާ ގުޅިގެން އެ މައްސަލަ ވަނީ ފުލުހުންނަށް ވަގުތުން ރިޕޯޓުކޮށްފައެވެ. މި މައްސަލަ ރިޕޯޓުކޮށްފައިވަނީ ރޭގެ ވަގުތެއްގައި ކަމަށް ފުލުހުން މައުލޫމާތުދެއެވެ.
ޝަހުބާނަކީ މިދިޔަ މާރިޗު މަހުގެ 18 ވަނަ ވަނަ ދުވަހު ގ. ހިޔާ ރޯދި ގޭގައި ހިނގި އަލިފާނުގެ ހާދިސާގެ ތުހުމަތުގައި ހައްޔަރުކޮށް 30 ދުވަހުގެ މުއްދަތަށް ބަންދުކޮށްފައި ހުރި މީހެކެވެ.
ފުލުހުން ހާމަކޮށްފައިވާ ގޮތުގައި، އޭނާއަކީ ކުށުގެ އެތައް ރެކޯޑެއް އޮންނަ މީހެކެވެ.
