ކުރީގެ ތިން ރައީސުން ކަމަށްވާ މުޙައްމަދު ނަޝީދާއި، ޢަބްދުﷲ ޔާމީން ޢަބްދުލްޤައްޔޫމްގެ އިތުރުން އިބްރާހިމް މުޙައްމަދު ޞާލިޙާއި ތިން ބޭފުޅުން ނިންމަވާ ނިންމުންތައް ތަންފީޒުކުރުމުގައި އެއްބާރުލުންދީ އެހީތެރިކަން ފޯރުކޮށްދޭނެކަމުގެ ޔަގީންކަން ޔާމީން އިސްވެ ހުންނަވައި އުފެއްދެވި ޕީއެންއެފްއިން ދީފިއެވެ.
ޕީއެންއެފްއިން މިކަން މިގޮތަށް ކުރުމަށް ނިންމާފައިވަނީ އެ ޕާޓީގެ ސެނެޓުގެ ތިންވަނަ ބައްދަލުވުމުގެ ތެރެއިންނެވެ. ޕީއެންއެފްގެ މި ނިންމުން ފާސްވީ ސެނެޓުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.
މިކަމާ ގުޅިގެން ޕީއެންއެފްއިން ނެރެފައިވާ ބަޔާނެއްގައި ބުނެފައިވަނީ، ކުރީގެ ތިން ރައީސުން ގުޅިގެން އެކުގައި ފެއްޓެވި މި މަސައްކަތްތަކަށް އެއްބާރުލުން ދޭން ނިންމީ ސަރުކާރުގެ އަމަލުތައް ހުރިގޮތުގެ ސަބަަބުން ކަމަށެވެ. އެ ޕާޓީން ނެރެފައިވާ ބަޔާނުގައިވާ ގޮތުން، ދައުލަތުގެ އެންމެހައި ބާރުތަކެއް ފެށިގެން އަންނާނީ ވެސް އަދި ދެމި އޮންނާނީ ވެސް، ރައްޔިތުންގެ ކިބައިން ކަމަށް ވަނީ ބުނެފައެވެ.
ނަމަވެސް ދައުލަތް ހިންގުމުގެ ދުސްތޫރީ އޮނިގަނޑުން ބޭރުން ސަރުކާރުން ކަންކަން ކުރަމުންދާ ކަމަށާއި އެގޮތުން ޝަރުއީ ނިޒާމަށް ވެރިކަމުގެ ބާރުން ބާރު ފޯރުވުމުގެ އިތުރުން، ރައްޔިތުންގެ މަޖިލީހުގެ މެންބަރުންނަށް ސަރުކާރުން ނުފޫޒު ފޯރުވަމުންދާ ކަމަށް ވަނީ ތުހުމަތުކޮށްފައެވެ.
ޕީއެންއެފްއިން ތުހުމަތު ކުރާ ގޮތުގައި، މި ސަރުކާރުން އަންނަނީ ރައްޔިތުންގެ މަޖިލީހުގެ ބާރު ކަނޑުވާލައި ފަނޑިޔާރުގެއާއި ދައުލަތުގެ މުއައްސަސާތަކުގެ މުސްތަގިއްލުކަން، ގެއްލުވާލައި ދައުލަތުގެ ބާރުތަކުގެ މައްޗަށް އޮތް ފާރަވެރިވުމުގެ ނިޒާމު ހަލާކުކޮށްލަމުންނެވެ. މީގެ އިތުރުން ލާމަރުކަޒީ ނިޒާމު ފުނޑުފުނޑުކޮށް ހެޔޮވެރިކަމުގެ ނިޒާމު ހީނަރުކޮށް، ހުދުމުހުތާރު، އަދި އަނިޔާވެރި، ވެރިކަމަކަށް ގައުމުގެ މިސްރާބު ބަދަލުވެފައިވާ ކަމަށް ވެސް ތުހުމަތުކޮށްފައިވެއެވެ.
އަދިހަމައެހެންމެ، ގާނޫނުތަކުން ދިވެހި ރައްޔިތުންނަށް ކަށަވަރުކޮށްދީފައިވާ އަސާސީ ހައްގުތަކަށް ރައީސް ޑރ. މުހައްމަދު މުއިއްޒުގެ ސަރުކާރުން ފާޅުކަން ބޮޑުގޮތެއްގައި އަރައިގަނެ އެ ހައްގުތައް ނިގުޅައިގެންފައިވާ ކަމަށް ވެސް އެ ޕާޓީން ވަނީ ތުހުމަތުކޮށްފައެވެ.
މި ސަރުކާރުގެ މައްޗަށް މިފަދަ ބޮޑު ތުހުމަތެއް ޕީއެންއެފްއިން ކޮށްފައިވާއިރު، އެ ތިން ރައީސުންގެ ވެރިކަމުގައި ރައްޔިތުންގެ މަޖިލީހުގެ ބާރު ކަނޑުވާލައި، ރައްޔިތުންގެ މަޖިލީހުގެ މެންބަރުންނަށް ނުފޫޒު ފޯރުވުމާއި، ވައްކަމާއި ކޮރަޕްޝަންގެ އިތުރުން ޝަރުއީ ނިޒާމަށް ނުހައްގުން ބާރު ފޯރުވުން ފަދަ އެތަށް އަމަލެއް ފާޅުގައި ހިންގާފައިވާތީ ރައްޔިތުންގެ ނުރުހުން ވަނީ އަމާޒުވެފައެވެ.
