ސަރުކާރުގެ މަސައްކަތްތަކާއި ސިޔާސަތުތަކާ ގުޅޭގޮތުން ރައްޔިތުންނަށް މަޢުލޫމާތު ފޯރުކޮށްދިނުމަށްޓަކައި ޕީއެސްއެމް ނިއުސްއިން އަލަށް ފަށާ ”ނޭޝަން ޗެޓް“ ޕްރޮގްރާމް މިރޭ ފެށުމަށް ހަމަޖެހިއްޖެއެވެ.
މި ޕްރޮގްރާމުގެ ފުރަތަމަ އެޕިސޯޑް ދެއްކުމަށް ހަމަޖެހިފައިވަނީ މިރޭ 9:00 ގައެވެ. މި ޕްރޮގްރާމުގައި ރައްޔިތުންނަށް މަޢުލޫމާތު ފޯރުކޮށްދެއްވާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. މި ޕްރޮގްރާމަކީ ސަރުކާރުން ކުރަމުންދާ މަސައްކަތްތަކުގެ ތަފުސީލުތައް ސީދާ ރައީސުލްޖުމްހޫރިއްޔާގެ ފަރާތްޕުޅުން ރައްޔިތުންނަށް ގެނެސްދިނުމަށް ފަރުމާކޮށްފައިވާ ޕްރޮގްރާމެކެވެ.
މިރޭގެ އެޕިސޯޑުގައި ރާއްޖޭގެ ސިޔާސީ މަޝްރަހާއި، ޤައުމުގެ ތަރައްޤީއަށް ކުރެވޭ މަސައްކަތްތަކުގެ އިތުރުން ޞިއްޙީ ދާއިރާ އާއި އިޖުތިމާޢީ އެކި މައްސަލަތަކާ ގުޅޭގޮތުން ރައީސުލްޖުމްހޫރިއްޔާ ވާހަކަފުޅު ދައްކަވާނެއެވެ. އަދި ވަޠަނީ ޚިދުމަތާ ގުޅޭ މުހިންމު މަޢުލޫމާތުތަކެއްވެސް މި ޕްރޮގްރާމުގެ ތެރެއިން ހިއްސާކުރައްވާނެއެވެ.
”ނޭޝަން ޗެޓް“ ޕްރޮގްރާމް މިރޭ 9:00 އިން ފެށިގެން ޕީއެސްއެމް ނިއުސް، ޓީވީއެމް އަދި ދިވެހިރާއްޖޭގެ އަޑުން އެއްވަގުތެއްގައި ބްރޯޑްކާސްޓް ކުރާނެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން، ސަރުކާރުގެ ދެފުށް ފެންނަ މިންވަރު އިތުރުކުރުމަށާއި ރައްޔިތުންނަށް މަޢުލޫމާތު ފޯރުކޮށްދިނުމަށް ގިނަ މަސައްކަތްތަކެއް ދަނީ ކުރައްވަމުންނެވެ. އެގޮތުން، ކޮންމެ ހަފުތާއަކު ނޫސްވެރިންނާ ބައްދަލުކުރައްވައި، ނޫސްވެރިންގެ ސުވާލުތަކަށް ޖަވާބުދެއްވުމާއި ސަރުކާރުން ހާމަކުރަން ބޭނުންވާ މުހިންމު ކަންކަން ހިއްސާކުރެއްވުމަކީ އެމަނިކުފާނު ޚާއްޞަ އިސްކަމެއް ދެއްވައިގެން ކުރިއަށްގެންދަވާ ކަމެކެވެ.
