ބޭސް ލިބުމުގައި ދިމާވާ ދަތިތައް ހައްލުކުރުމަށް ސަރުކާރުން ކުރަމުން އަންނަ މަސައްކަތުގެ ދަށުން، ސަރުކާރުގެ ބޭސް ކުންފުނި (ސްޓޭޓް ފާމަސޫޓިކަލް) ގެ ފުރަތަމަ ބޭސް ފިހާރަ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި މިއަދު ހުޅުވައިފިއެވެ.
ސަރުކާރުގެ ބޭސް ކުންފުނީގެ ފުރަތަމަ ބޭސް ފިހާރަ ރަސްމީކޮށް ހުޅުވައިދެއްވީ މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ހަލީމާއި ސްޓޭޓް ފާމަސޫޓިކަލްގެ މެނޭޖިންގ ޑިރެކްޓަރު ޑރ. ޝާހު މާހިރެވެ.
24 ގަޑިއިރު ހިދުމަތްދޭ މި ބޭސް ފިހާރަ މެދުވެރިކޮށް ބޭސް ސިޓީތަކަށް ބޭސް ދޫކުރުމާއި، އާންމުކޮށް ވިއްކާ ބޭސްތައް ލިބުމުގެ އިތުރުން، ރާއްޖޭގެ ބާޒާރުން ލިބެން ނެތް ބޭސްތައް ބޭރުގެ މާކެޓްތަކުން ހޯދައިދިނުމުގެ އިންތިޒާމުތައް ވަނީ ގާއިމްކޮށްފައެވެ. މީގެއިތުރުން، އައިޖީއެމްއެޗްގައި އެޑްމިޓްކޮށްގެން ފަރުވާދޭ ބަލިމީހުންނަށް ބޭނުންވާ ބޭހާއި ސިއްހީ އާލަތްތައް ފޯރުކޮށްދިނުމުގެ ތައްޔާރީތައް އެ ކުންފުނިން އަންނަނީ ކުރަމުންނެވެ.
ސްޓޭޓް ފާމަސޫޓިކަލްއިން އަންނަނީ އެސްޓީއޯގެ ދަށުން ހިންގާ ހުރިހާ ފާމަސީތަކެއް އެ ކުންފުނީގެ ދަށަށް ބަދަލުކުރުމުގެ މަސައްކަތްތައް ކުރަމުންނެވެ. އެގޮތުން އަންނަ ޖުލައި މަހަށް މި މަސައްކަތް އެއްކޮށް ނިންމާލެވޭނެ ކަމަށް އެ ކުންފުނިން ވަނީ މައުލޫމާތު ދީފައެވެ. މީގެ އިތުރުން ސަރުކާރުގެ ހުރިހާ ފާމަސީއެއްގެ ސްޓޮކް ބެލޭނެ ޑިޖިޓަލް ނިޒާމެއް ގާއިމުކުރުމުގެ މަސައްކަތް ވެސް އެ ކުންފުނިން އަންނަނީ ކުރަމުންނެވެ.
މި ބޭސް ފިހާރާގައި މަސައްކަތް ކުރާނެ ފާމަސިސްޓުންނާއި ފާމަސިސްޓުންގެ އެސިސްޓެންޓުން ހޯދުމަށް ވެސް ސްޓޭޓް ފާމަސޫޓިކަލްއިން ވަނީ އިއުލާންކޮށްފައެވެ.
ބޭސް ލިބުމުގައި ދިމާވާ މައްސަލަތައް ހައްލުކުރުމަށްޓަކައި ޑޮކްޓަރީ ބޭހާއި މެޑިކަލް ކޮންޒިއުމަބަލްސް އާއި މެޑިކަލް އިކުއިޕްމަންޓް ގަނޑުކޮށް ގެންނަން ސަރުކާރުން ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް ނަމުގައި ކުންފުންޏެއް އުފެއްދީ މިދިޔަ 2025 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ.
