މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ ސަބަބުން މަސްވެރިކަމުގެ ސިނާއަތަށް ކުރާ އަސަރު ކުޑަކުރުމަށް ސަރުކާރުން ކުރަމުން އަންނަ މަސައްކަތްތަކުގެ ދަށުން މިހާތަނަށް 2.5 މިލިއަން ލީޓަރުގެ ތެޔޮ ހެޔޮ އަގުގައި މަސްވެރިންނަށް ދޫކޮށްފައިވާ ކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި ކްރައިސިސް ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި ފިޝަރީޒް މިނިސްޓްރީގެ މަސައްކަތްތަކާ ގުޅޭގޮތުން މައުލޫމާތު ދެއްވަމުންނެވެ. މިނިސްޓަރު ވިދާޅުވީ، މިއަހަރުގެ ފެބްރުއަރީ މަހުން ފެށިގެން ތެޔޮ ވިއްކާ އަގަށް ދީފައިވާ ލުޔާއެކު، މަސްވެރިންނަށް މާ ބޮޑު ދަތިކަމެއް ނެތި ކަނޑުތަކަށް ނިކުމެވޭނެ އިންތިޒާމު ހަމަޖެހިފައިވާ ކަމަށެވެ. މިގޮތުން މިހާތަނަށް 1832 އުޅަނދަކަށް މި ޚިދުމަތް ފޯރުކޮށްދެވިފައިވާ ކަމަށް އޭނާ ފާހަގަކުރެއްވިއެވެ.
ރާއްޖޭގެ ހުރިހާ އަތޮޅަކުން ވެސް ތެޔޮ ލިބޭނެ އިންތިޒާމު ގާއިމުކުރެވިފައިވީ ނަމަވެސް، ލޮޖިސްޓިކްސްގެ ގޮތުން ބައެއް ގޮންޖެހުންތައް ހުރިކަމަށް މިނިސްޓަރު ޝިޔާމް ވަނީ ވިދާޅުވެފައެވެ.
”މި ނެޓްވޯކު ގާއިމުކުރެވުނުއިރު ލޮޖިސްޓިކަލީ ހުރި ޗެލެންޖުތަކަށް މުޅިން އަދި އެޑްރެސް ނުކުރެވޭ. ނަމަވެސް މަސްވެރިންނަށް އުނދަގޫ ނުވާނެ މިންވަރަށް އެކަންތައްތަކަށް އަހަންމިއްޔަތުކަން ދީގެން ފޯރުކޮށްދެވޭ،“ – މިނިސްޓަރު ޝިޔާމް ވިދާޅުވިއެވެ.
މިނިސްޓަރު ޝިޔާމް އިތުރަށް ވިދާޅުވީ، މަސްވެރިންނަށް ތެޔޮ ވިއްކުމުގައި އަގުން ލުއި ދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވައިގެން ކުރައްވާ ކަމެއް ކަމަށާއި، އެގޮތުން މިހާރު ހުރި ދަތިތައް ހައްލުކޮށް ހިދުމަތް އިތުރަށް ހަރުދަނާކުރުމުގެ މަސައްކަތް ކުރަމުން އަންނަ ކަމަށެވެ.
