މާލޭގެ މާރުކޭޓުތަކުގެ އިންފްރާސްޓްރަކްޗަރ ޒަމާނީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ ”މާލެ ވެޓް މާކެޓް ކޮމްޕްލެކްސް“ މަޝްރޫޢަށް ބޭނުންވާ ބިން މާލެ ސިޓީ ކައުންސިލުން ހަވާލުނުކުރުމުގެ ސަބަބުން، މަޝްރޫޢުގެ ޢަމަލީ މަސައްކަތް ނުފެށި ލަސްވަމުންދާކަމަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ހާމަކޮށްފިއެވެ.
މި މަޝްރޫޢާ ގުޅޭގޮތުން އެ މިނިސްޓްރީން ނެރުނު ނޫސްބަޔާނެއްގައި ބަޔާންކޮށްފައިވާ ގޮތުގައި، 116.9 މިލިއަން ރުފިޔާގެ މި ބޮޑު މަޝްރޫޢު 15 މާރިޗު 2026 ގައި ވަނީ ޓްރަސްޖެންގް މޯލްޑިވްސް ޕްރައިވެޓް ލިމިޓެޑާ ހަވާލުކުރެވިފައެވެ. ކޮންޓްރެކްޓަރ ފައިނޭންސް އުސޫލުން ކުރިއަށްގެންދާ މި މަޝްރޫޢުގެ ފައިސާގެ ކަންކަމާއި އިދާރީ ހުރިހާ ތައްޔާރީތަކެއް މިހާރު ވަނީ ނިމިފައެވެ.
ޒަމާނީ ފެންވަރަށް ފަރުމާކުރެވިފައިވާ މި ކޮމްޕްލެކްސްގައި ހަ ފަންގިފިލާ ހިމެނޭއިރު، ގާތްގަނޑަކަށް 85,000 އަކަފޫޓުގެ ޖާގަ ލިބިގެންދާނެއެވެ. އިމާރާތުގެ ބޭސްމަންޓް ޕާކިންގް އަށް ޚާއްޞަކުރެވިފައިވާއިރު، ގްރައުންޑް ފްލޯގައި މަސް މާރުކޭޓެއް، އަދި ފުރަތަމަ ތިން ފަންގިފިލާގައި ދަނޑުވެރިކަމުގެ އުފެއްދުންތަކާއި މޭވާ އަދި ތަރުކާރީ މާރުކޭޓު ހިމެނެއެވެ. މީގެ އިތުރުން ޓެރަސްގައި ފުޑް ކޯޓެއް ތަރައްޤީކުރުމަށް ވެސް ވަނީ ނިންމާފައެވެ.
މިނިސްޓްރީން ހާމަކުރި ގޮތުގައި، މަޝްރޫޢު ކުރިއަށް ގެންދިއުމަށްޓަކައި ބިން ހަވާލުކުރުމަށް އެދި މާލެ ސިޓީ ކައުންސިލަށް ހަތަރު ފަހަރެއްގެ މަތިން ވަނީ ސިޓީ ފޮނުވާފައެވެ.އެންމެ ފުރަތަމަ 29 މާރިޗު 2026 ގައި ބިން ހަވާލުކުރުމަށް އެދިފައިވާއިރު، އޭގެ ފަހުން އޭޕްރީލް މަހާއި މޭ މަހުގެ ތެރޭގައި ވެސް ތަކުރާރުކޮށް ވަނީ އެދިފައެވެ. ނަމަވެސް، ދެ މަސްދުވަސް ވެގެންދިޔައިރު ވެސް ކައުންސިލުން ބިން ހަވާލުކޮށްފައި ނުވާ ކަމަށް މިނިސްޓްރީން ބުނެއެވެ.
މި މަޝްރޫޢަކީ 600 ދުވަހުގެ ތެރޭގައި ނިންމަން ކަނޑައަޅާފައިވާ، މާލޭގެ ރައްޔިތުންނަށް ނުހަނު ބޭނުންތެރި މަޝްރޫޢެކެވެ. މަސައްކަތް ލަސްވާ ކޮންމެ ދުވަހަކީ މަޝްރޫޢުގެ އަގު ބޮޑުވެ، ރައްޔިތުންނަށް ލިބެންޖެހޭ ޚިދުމަތްތައް ލަސްވެގެންދާނެ ކަމެއް ކަމަށް މިނިސްޓްރީން ފާހަގަކުރެއެވެ.
