މިއަހަރުގެ ފެބުރުއަރީ އަދި މާރިޗު މަހު ބޭއްވި އައިޖީސީއެސްއީ އަދި އެސްއެސްސީ އިމްތިހާން (އޯލެވެލް އިމްތިހާން) ގެ ނަތީޖާ ދޫކުރަން ފަށައިފިއެވެ.
އޯލެވެލް އިމްތިހާނުގެ ނަތީޖާ ދޫކުރުމުގެ މަސައްކަތް މިއަދު މެންދުރު 12:00 އިން ފެށިގެން، އިމްތިހާނު ހެދި ސެންޓަރުތަކުން އަންނަނީ ކުރަމުންނެވެ. އިމްތިހާނުގައި އަމިއްލަ ގޮތުން ބައިވެރިވި ކެންޑިޑޭޓުންގެ ނަތީޖާ ދޫކުރާނީ ޑިޕާޓްމަންޓް އޮފް ޕަބްލިކް އެގްޒާމް (ޑީޕީއީ) ގެ ކައުންޓަރުތަކުންނެވެ.
އިމްތިހާނުގެ ނަތީޖާ ދޫކުރުމަށް ހަމަޖެހިފައިވަނީ ރަސްމީ ބަންދު ނޫން ކޮންމެ ދުވަހެއްގެ ހެނދުނު 08:30 އިން ފެށިގެން މެންދުރުފަހު 13:30 އަށެވެ.
ނަތީޖާ ބަލާ ދާއިރު ކެންޑިޑޭޓުގެ ދިވެހި ރައްޔިތެއްކަން އަންގައިދޭ ކާޑު ގެންނަންވާނެ ކަމަށާއި ނަމަވެސް ބަދަލުގައި މީހަކު ފޮނުވާނަމަ، ކެންޑިޑޭޓުގެ އައިޑީކާޑު ނުވަތަ އައިޑީކާޑުގެ ފޮޓޯއެއް އަދި ހަވާލުވާ ފަރާތުގެ އައިޑީކާޑު ގެންނަންވާނެ ކަމަށް ޑީޕީއީން ވަނީ ބުނެފައެވެ.
ފާހަގަކޮށްލެވޭ ގޮތުގައި، މިއަހަރު 267 ސެންޓަރެއްގައި 8،218 ދަރިވަރުން އައިޖީސީއެސްއީ އަދި އެސްއެސްސީ އިމްތިހާނު ހަދާފައިވާ ކަމަށް އެޑިއުކޭޝަން މިނިސްޓްރީގެ ތަފާސްހިސާބުތަކުން ދައްކައެވެ. އެއީ މާލެ ސަރަހައްދުގެ 21 ސެންޓަރަކާއި އަތޮޅުތަކުގެ 246 ސެންޓަރެއްގައެވެ.
