އދ. މަހިބަދޫ ކައުންސިލަށް ނައިބު ރައީސަކު ހޮވުމަށް ކައުންސިލް މެމްބަރުންގެ މެދުގައި އަށްވަނަ ފަހަރަށް ވޯޓަށް އަހައިގެން، އެ މަގާމަށް އެމްޑީޕީގެ ޓިކެޓުގައި ވާދަކޮށް ގޮނޑި ކާމިޔާބު ކުރި ކައުންސިލް މެންބަރު ޒަޢީމާ މުޙައްމަދު ހޮވިއްޖެއެވެ.
މަހިބަދޫ ކައުންސިލަށް ނައިބު ރައީސަކު ނުހޮވި ދިގުލައިގެން ގޮސްފައިވަނީ، އެ މަގާމަށް މެންބަރަކު ހޮވުމަށް ވޯޓަށް އަހާ ކޮންމެ ފަހަރަކު ވޯޓު އެއްވަރުވުމުގެ ސަބަބުންނެވެ. އެއާއެކު ކައުންސިލްގެ މަސައްކަތްތައް ވެސް ނުފެށި ދިގުލައިގެން ދިޔައެވެ. ގާނޫނު އޮންނަ ގޮތުން، ކައުންސިލަށް މެންބަރުން އިންތިހާބުވުމަށްފަހު ބާއްވާ ފުރަތަމަ ޖަލްސާގައި އެ ކައުންސިލަކަށް ނައިބު ރައީސަކު ހޮވަން ޖެހެއެވެ. ކައުންސިލްގެ މަސައްކަތްތައް ފެށޭނީ އެ ކައުންސިލަކަށް މެންބަރުން އިންތިހާބުވުމަށްފަހުގައެވެ.
މަހިބަދޫ ކައުންސިލުގެ ނައިބު ރައީސްކަމުގެ މަގާމަށް ތިން ބޭފުޅަކު ވާދަކުރެއްވިއެވެ. އެއީ އެމްޑީޕީގެ ފަރާތުން މެންބަރަކާއި، ވެރިކަން ކުރާ ޕާޓީ ޕީއެންސީގެ ފަރާތުން މެންބަރެއްގެ އިތުރުން، އަމިއްލަ ގޮތުން ވާދަކޮށް ކައުންސިލަށް އިންތިހާބުވި މެންބަރެކެވެ. ލިބުނު ނަތީޖާއަށް ބަލައިލާއިރު އެމްޑީޕީގެ މެންބަރު ޒަޢީމާ މުޙައްމަދަށް 2 ވޯޓު ލިބިފައިވާއިރު، ޕީއެންސީގެ މެންބަރު މުޙައްމަދު މައުމޫނަށް ވެސް ލިބިފައިވަނީ 2 ވޯޓެވެ. އަދި އަމިއްލަ ގޮތުން ވާދަކޮށް ކައުންސިލަށް އިންތިހާބުވި މެންބަރު ބުންޏާމީން ޙަސަނަށް ލިބިފައިވަނީ އެންމެ ވޯޓެކެވެ.
ފާހަގަކޮށްލެވޭ ގޮތުގައި އިއްޔެ މެންދުރާ ހަމައަށް ކައުންސިލްގެ ނައިބު ރައީސަކު ހޮވުމަށް ހަތް ބައްދަލުވުން ބާއްވާފައިވާއިރު، އެ ވަގުތާ ހަމައަށް ވެސް ވޯޓުގެ ނަތީޖާ ވަނީ އެއްވަރުވެފައެވެ.
މި މައްސަލާގައި އެންމެފަހުން ގޮތް ނިންމާފައިވަނީ ރޭ އެކަމަށްޓަކައި ބޭއްވި ބައްދަލުވުމުގެ ތެރެއިންނެވެ. އެ ބައްދަލުވުމުގައި ނެގުނު ވޯޓުން ޒަޢީމާ މުޙައްމަދު ވަނީ މުޙައްމަދު މައުމޫންގެ މައްޗަށް ކުރި ހޯދައި 1 ވޯޓުގެ ތަފާތުން ނައިބު ރައީސްކަމުގެ މަގާމު ޔަގީންކޮށްފައެވެ.
