އެމެރިކާގެ ކެލިފޯނިއާ ސްޓޭޓުގެ ސެން ޑިއޭގޯގައި ހުންނަ އެންމެ ބޮޑު އިސްލާމީ މަރުކަޒަށް އަމާޒުކޮށް ދިން ނިރުބަވެރި ހަމަލާއެއްގައި ވަނީ 3 މުސްލިމުން ޝަހީދުކޮށްލާފައެވެ. އިއްޔެ ދީފައިވާ މި ހަމަލާގައި އެސެންޓަރުގެ މިސްކިތާއި ސްކޫލަށް އަމާޒުކޮށްފައިވާއިރު، ހަމަލާ ހުއްޓުވުމުގައި އިސް ދައުރެއް އަދާކުރި އެމިސްކިތުގެ އިމާމުވެސް ވަނީ ޝަހީދުވެފައެވެ.
މި ނިރުބަވެރި ހަމަލާ ދިނުމުގެ ކުރިން ހަމަލާދިން 17 އަހަރާއި 18 އަހަރުގެ ދެމީހުންގެ ތެރެއިން އެކަކު ސުއިސައިޑް ނޯޓެއް ދޫކޮށްފައި އޭނާގެ މައިންބަފައިންގެ ގެއިން އެމީހުންގެ ބަޑިއާއި ކާރު ހިފައިގެން ދިއުމުން ފުލުހަށް އެމީހުން ވަނީ މައްސަލަވެސް ހުށަހަޅާފައެވެ. އަދި ހަމަލާދިންތާ އިރުކޮޅެއްފަހުން އެދެމީހުންވެސް ވަނީ އެ އިސްލާމީ މަރުކަޒާއި ކައިރި ހިސާބެއްގައި ކާރުތެރޭގައި އަމިއްލައަށް ބަޑިޖަހާ މަރުވެފައި ކަމަށް އިދާރާތަކުން ބުނެފައި ވެއެވެ.
އެމީހުން އަމިއްލައަށް މަރުވި ކާރުގެ ތެރެއިން އިސްލާމްދީނާއި ދެކޮޅު ޝިއާރުތައް ފެނިފައިވާ ކަމަށް ފުލުހުންނާއި ހަވާލާދީ ނޫސްތަކުން ރިޕޯޓުކޮށްފައިވާއިރު، ރަސްމީކޮށް މި މައްސަލަ ބަލަމުން ދަނީ ”ހޭޓް ކްރައިމް“ އެއްގެ ގޮތުގައެވެ.
