ވިހި ވަނަ ރައްޔިތުންގެ މަޖިލީހުގެ އިންތިޚާބު އެޕްރީލު މަހުގެ 21 ވަނަ ދުވަހު ބާއްވަން އިލެކްޝަންސް ކޮމިޝަން (އީސީ) އިން މިރޭ ފާސްކޮށްފިއެވެ.
އީސީން ނިންމާފައި ވަނީ އިންތިޚާބުގެ ވޯޓުލުން 21 އެޕްރީލް ވާ އާދިއްތަ ދުވަހުގެ ހެނދުނު 08:00 އިން ފެށިގެން ހަވީރު 04:00 އަށް ކުރިއަށް ގެންދިއުމަށެވެ. ވޯޓު ގުނަން ފެށުމަށް ނިންމާފައި ވަނީ އެ ދުވަހުގެ ހަވީރު 04:30 ގައެވެ.
މަޖިލިސް އިންތިޚާބު ބޭއްވުމަށް އާ ތާރީޚެއް އީސީން ކަނޑައަޅާފައި މި ވަނީ ރޯދަ މަހު އެއްވެސް އިންތިޚާބެއް ނުބާއްވާ ގޮތަށް މަޖިލީހުން އިންތިޚާބުތަކާ ބެހޭ އާންމު ޤާނޫނަށް ގެނައި ފަސްވަނަ އިޞްލާޙު ރައީސް މުޙައްމަދު މުޢިއްޒު މިރޭ ތަޞްދީޤު ކުރެއްވުމާ ގުޅިގެންނެވެ. މީގެކުރިން މަޖިލިސް އިންތިޚާބު ބާއްވަން ހަމަޖެއްސީ އަންނަ މަހުގެ 17 ދުވަހުއެވެ.
ރައްޔިތުންގެ މަޖިލީހުން އެ ބިލު ފޮނުވި ފުރަތަމަ ފަހަރު ރައީސް ވަނީ ބިލު ތަޞްދީޤު ނުކުރައްވާ އަނބުރާ ފޮނުވާލައްވާފައެވެ. އެހެންނަމަވެސް ދެވަނަ ފަހަރަށް ވެސް މަޖިލީހުން ވަނީ އެ ބިލު ފާސްކޮށްފައެވެ. ރައީސް އެ ބިލު ތަޞްދީޤު ކުރައްވާފައި ވަނީ އެޓަރނީ ޖެނެރަލްގެ ލަފަޔާ އެކުގައެވެ.
