އދ. މަހިބަދޫ ކައުންސިލަށް ނައިބު ރައީސަކު ހޮވަން ކައުންސިލްގެ މެމްބަރުންގެ މެދުގައި އެތަށް ފަހަރެއްގެ މަތިން ވޯޓަށް އަހައިގެން ވެސް، ވޯޓު އެއްވަރުވުމުގެ ސަބަބުން ކައުންސިލްގެ ހިންގުން ހުއްޓުމަކަށް އަތުވެއްޖެއެވެ.
މައުލޫމާތު ލިބިފައިވާ ގޮތުގައި، މަހިބަދޫ ކައުންސިލަށް ނައިބު ރައީސަކު ހޮވަން ހަ ފަހަރެއްގެ މަތިން ވަނީ ވޯޓަށް އަހައިފައެވެ. ނަމަވެސް ވޯޓަށް އަހާ ކޮންމެ ފަހަރަކު ވެސް ވޯޓު އެއްވަރުވުމުގެ ސަބަބުން ކައުންސިލްގެ މަސައްކަތްތައް ވަނީ ފެށޭގޮތެއް ނުވެފައެވެ. ގާނޫނު އޮންނަ ގޮތުން، ކައުންސިލަށް މެންބަރުން އިންތިހާބުވުމަށްފަހު ބާއްވާ ފުރަތަމަ ޖަލްސާގައި އެ ކައުންސިލަކަށް ނައިބު ރައީސަކު ހޮވަން ޖެހެއެވެ. ކައުންސިލްގެ މަސައްކަތްތައް ފެށޭނީ އެ ކައުންސިލަކަށް މެންބަރުން އިންތިހާބުވުމަށްފަހުގައެވެ.
މަހިބަދޫ ކައުންސިލަށް އަލަށް އިންތިހާބުވި ފަސް މެންބަރުން އިއްޔެ ވަނީ މަގާމުގެ ހުވައި ކުރައްވައިފައެވެ.
މަހިބަދޫ ކައުންސިލުގެ ނައިބު ރައީސްކަމުގެ މަގާމަށް ތިން ބޭފުޅަކު ވާދަކުރެއްވިއެވެ. އެއީ އެމްޑީޕީގެ ފަރާތުން މެންބަރަކާއި، ވެރިކަން ކުރާ ޕާޓީ ޕީއެންސީގެ ފަރާތުން މެންބަރެއްގެ އިތުރުން، އަމިއްލަ ގޮތުން ވާދަކޮށް ކައުންސިލަށް އިންތިހާބުވި މެންބަރެކެވެ. އެގޮތުން އެންމެ ފުރަތަމަ ބުރުގެ ނަތީޖާއަށް ބަލައިލާއިރު އެމްޑީޕީގެ މެންބަރު ޒަޢީމާ މުޙައްމަދަށް 2 ވޯޓު ލިބިފައިވާއިރު، ޕީއެންސީގެ މެންބަރު މުޙައްމަދު މައުމޫނަށް ވެސް ލިބިފައިވަނީ 2 ވޯޓެވެ. އަދި އަމިއްލަ ގޮތުން ވާދަކޮށް ކައުންސިލަށް އިންތިހާބުވި މެންބަރު ބުންޏާމީން ޙަސަނަށް ލިބިފައިވަނީ އެންމެ ވޯޓެކެވެ.
މި ދެ މެންބަރުންގެ ނަތީޖާ އެއްވަރުވުމާ ގުޅިގެން އިތުރު ފަސް ފަހަރު ވޯޓަށް އެހި ނަމަވެސް ބާތިލު އެއް ވޯޓާއެކު ކޮންމެ ފަހަރަކު ވެސް އޮންނާތީ ނަތީޖާ އެއްވަރުވެފައެވެ.
