ވ. އަތޮޅުގެ މަޝްހޫރު ”މިޔަރު ޑައިވް“ ސައިޓުގެ ކަނޑުއަޑީގެ ހޮހަޅައަށް ފީނަން ގޮސް އުޅެނިކޮށް ގެއްލުނު އިޓަލީގެ ހަތަރު ޑައިވަރުންގެ ހަށިގަނޑުތައް، ބޭރުގެ ތަޖުރިބާކާރުންގެ އެހީގައި މިއަދު ހޯދައިފިއެވެ.
އެމްއެންޑީއެފުން މަޢުލޫމާތު ދެއްވާފައިވާ ގޮތުގައި، ގެއްލުނު ފަތުރުވެރިންގެ ހަށިގަނޑުތައް ލޮކޭޓް ކުރެވިފައިވަނީ މިއަދު ކުރިއަށް ގެންދިޔަ ޚާއްޞަ އޮޕަރޭޝަނެއްގައެވެ. މި ހަށިގަނޑުތައް ފެނިފައިވަނީ އެމީހުން ޑައިވް ކުރަން ވަން ހޮހަޅައިގެ ތެރެއިންނެވެ. އެމްއެންޑީއެފުން ވިދާޅުވީ، ކުރިއަށް ހުރި ޑައިވްތަކުގައި އެމީހުންގެ ހަށިގަނޑުތައް ހޮހޮޅައިން ބޭރަށް ނެގުމުގެ މަސައްކަތް ކުރުމަށް މިހާރު ރޭވިފައިވާ ކަމަށެވެ.
މި އޮޕަރޭޝަނާ ގުޅޭގޮތުން ސަރުކާރުގެ ތަރުޖަމާނު، މުހައްމަދު ހުސެއިން ޝަރީފް (މުންދު) އޮންލައިން ނޫހަކަށް މަޢުލޫމާތު ދެއްވަމުން ވަނީ ހަށިގަނޑުތައް ފެނުނުކަން ކަށަވަރުކޮށްދެއްވައިފައެވެ. މުންދު ވިދާޅުވީ، ހަށިގަނޑުތައް ލޮކޭޓް ކުރެވުނީ އެމްއެންޑީއެފްގެ ކޯސްޓްކާޑާއި، ފުލުހުންގެ ޑައިވް ޓީމުގެ އިތުރުން، އިޓަލީ ސަރުކާރުގެ އެހީގައި އެކުލަވާލި ބޭރުގެ ތަޖުރިބާކާރުންގެ ޑައިވް ޓީމުން މިއަދު ކުރި ބުރަ މަސައްކަތުން ކަމަށެވެ.
”ކުރިއަށް އޮތް ދުވަސްތަކުގައި އެމީހުންގެ ހަށިގަނޑުތައް ނެގުމުގެ މަސައްކަތް ކުރިއަށްދާނެ،“ މުންދު ވިދާޅުވިއެވެ. އަދި މި އޮޕަރޭޝަނުގައި ބޭރުގެ ތަޖުރިބާކާރުން ބައިވެރިވީ، ރާއްޖޭގެ ޑައިވަރުންނަށް ނުރައްކާވެދާނެ ކަމަށް ބެލެވޭ ސަރަހައްދުތަކަށް ދިވެހި ޑައިވަރުން ނުފޮނުވުމަށް ސަރުކާރުން ނިންމަވާފައިވާތީ ކަމަށްވެސް އޭނާ ފާހަގަކުރެއްވިއެވެ.
މި ހާދިސާ ހިނގާފައިވަނީ މިދިޔަ ބުރާސްފަތި ދުވަހު ވ. އަތޮޅުގެ ކަނޑުއަޑީގެ ހޮހަޅައަކަށް އިޓަލީގެ ހަތަރު ޑައިވަރަކާއި އެމީހުންގެ އިންސްޓްރަކްޓަރު ފީނަން ގޮސް އުޅެނިކޮށެވެ. މި ހާދިސާގައި މަރުވެފައިވަނީ މޮނިކާ މޮންޓެފަލްކޯން (52އ)، އޭނާގެ ދަރިފުޅު ޖިއޯޖިއާ ސޮމަކާލް (20އ)، މުރީއެލް އޮޑެނިނޯ (31އ)، ޖިއަންލުކާ ބެނެޑެޓީ (44އ) އަދި ފެޑެރީކޯ ގުއަލްޓިއަރީ (31އ) އެވެ.
މީގެ ތެރެއިން އިންސްޓްރަކްޓަރުގެ ގޮތުގައި ހުރި އުމުރުން 44 އަހަރުގެ ޖިއަންލުކާ ބެނެޑެޓީގެ ހަށިގަނޑު މީގެ ކުރިން ވަނީ ކަނޑުގެ 60 މީޓަރު (197 ފޫޓް) އަޑިން ހޮހަޅައިގެ ތެރެއިން ފެނިފައެވެ. ބާކީ ތިބި މީހުން މަރުވެފައި ތިއްބާ ފެނުނީ ދިގުމިނުގައި ގާތްގަނޑަކަށް 200 ފޫޓު ހުންނަ އެ ނުރައްކާތެރި ހޮހޮޅައިގެ އެންމެ އެތެރެއިންނެވެ.
