ދިވެހިރާއްޖޭގެ ގައުމީ އެއަރލައިން، މޯލްޑިވިއަނުން އޮސްޓްރޭލިއާގެ މެލްބަންއަށް ސީދާ ދަތުރުތައް ފަށައި، ތާރީޚީ ކުރިއެރުމެއް ހޯދައިފިއެވެ. މިއީ ރާއްޖެއާއި އޮސްޓްރޭލިއާއާ ދެމެދު ސީދާ ވައިގެ ދަތުރުފަތުރުގެ ޚިދުމަތް ފެށި ފުރަތަމަ ފަހަރެވެ.
މި ތާރީޚީ ދަތުރުގެ ފުރަތަމަ ފްލައިޓް މިހާރު ވަނީ ވެލާނާ އިންޓަރނޭޝަނަލް އެއަރޕޯޓުން އޮސްޓްރޭލިއާއަށް ފުރާފައެވެ. މޯލްޑިވިއަނުން މަޢުލޫމާތު ދޭ ގޮތުގައި މި ފްލައިޓް މެލްބަންއަށް ދިއުމަށްފަހު، އެނބުރި ރާއްޖެ އައުމަށް ހަމަޖެހިފައިވަނީ މާދަމާ ހެނދުނުގެ ވަގުތެއްގައެވެ.
Our A330 aircraft has officially departed for Melbourne to begin a landmark journey, operating the first-ever direct flight between Australia and the Maldives.
Here’s to new horizons, unforgettable journeys, and a proud moment for the Maldives. 🇲🇻 #MaldivianAero… pic.twitter.com/sN0RakSLG9
— MaldivianAero (@MaldivianAero) May 17, 2026
މޯލްޑިވިއަނުން އޮސްޓްރޭލިއާއާއި ރާއްޖެއާ ދެމެދު ހަފްތާއަކު އެއް ފްލައިޓް ބޭއްވުމަށް ވަނީ ތާވަލުކޮށްފައެވެ. މި ދަތުރުތަކުގައި ބޭނުންކުރުމަށް ހަމަޖެހިފައިވަނީ އެ އެއަރލައިންގެ ވައިޑް ބޮޑީ އެއަރކްރާފްޓެވެ. މިއީ ދިގު ދަތުރުތަކަށް ޚާއްޞަކޮށްގެން މޯލްޑިވިއަނުން ތައާރަފުކޮށްފައިވާ ބޯޓެކެވެ.
މި ދަތުރުތައް ފެށުމާ ގުޅޭގޮތުން މޯލްޑިވިއަނުން ބުނީ، މެލްބަންއަށް ދަތުރުތައް ފެށުމަށް ނިންމީ މާކެޓް ވަރަށް ބޮޑަށް ދިރާސާކުރުމަށްފަހު ކަމަށެވެ. މިގޮތުން އޮސްޓްރޭލިއާއަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ މާކެޓަކަށް ވުމަކީ މި ދަތުރުތައް ފެށުމަށް ނިންމި އެންމެ މައިގަނޑު ސަބަބު ކަމުގައި އެ ކުންފުނިން ފާހަގަކުރެއެވެ.
ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކަށް ބަލާއިރު، އޮސްޓްރޭލިއާއަކީ މި އަހަރުގެ މިހާތަނަށް ރާއްޖެއަށް 10 ވަނައަށް އެންމެ ގިނަ ފަތުރުވެރިން ޒިޔާރަތްކުރި ގައުމެވެ. މި މަހުގެ 16 ވަނަ ދުވަހުގެ ނިޔަލަށް އެ ގައުމުން 18,066 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މޯލްޑިވިއަންގެ މި ސީދާ ދަތުރުތަކާއެކު، އޮސްޓްރޭލިއާ މާކެޓުން ރާއްޖެއަށް އަންނަ ފަތުރުވެރިންގެ އަދަދު އިތުރުވެ، ފަތުރުވެރިކަމަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.
